მას შემდეგ, რაც Marvel-ის ფანტასტიკური ოთხეულის ფრენჩაიზის გაცოცხლებაში მიიღეს მონაწილეობა ფილმით Fantastic Four: First Steps, რეჟისორი მეტ შეკმანი და სცენარისტი ჯოშ ფრიდმანი კიდევ ერთ მაღალი პროფილის პროექტს ჩაუდგებიან სათავეში. Deadline-ის წყაროების თანახმად, შეკმანი 20th Century-სთვის მაიმუნების პლანეტის ჯერჯერობით დაუსათაურებელ ფილმს გადაიღებს, სცენარზე კი ფრიდმანი იმუშავებს. შეკმანი ასევე იქნება ფილმის პროდიუსერიც, ფრენჩაიზის ვეტერან პროდიუსერებთან: რიკ ჯაფასთან და ამანდა სილვერთან ერთად.

სიუჟეტის დეტალები გასაიდუმლოებულია, თუმცა ცნობილია, რომ ფილმი დაგვაბრუნებს პლანეტაზე, სადაც მაიმუნები დომინანტი სახეობაა და ყველაფერს მართავენ. მიუხედავად იმისა, რომ ინფორმაცია ოფიციალურად არ დადასტურებულა, წყაროები Deadline-ს ეუბნებიან, რომ ეს არ იქნება 2024 წლის ფილმის, მაიმუნების პლანეტის სამეფოს გაგრძელება. ეს იქნება სრულიად ახალი, ორიგინალური ისტორია, რომელსაც შეკმანი და ფრიდმანი ერთად ამუშავებენ. აღსანიშნავია, რომ ფრიდმანი სილვერთან და ჯაფასთან ერთად წინა ფილმის სცენარის თანაავტორიც იყო.

ფრენჩაიზის ისტორია

მაიმუნების პლანეტა, 1968 წელი

ფოტო: 20th Century Fox

მაიმუნების პლანეტა 20th Century Studios-ის ერთ-ერთი ყველაზე პოპულარული და გამძლე ფრენჩაიზია, რომლის შემოსავალმა მსოფლიო მასშტაბით 1.7 მილიარდ დოლარს გადააჭარბა. პიერ ბულის რომანზე დაფუძნებული პირველი ფილმი 1968 წელს გამოვიდა და წლის ერთ-ერთი უდიდესი ჰიტი გახდა. მას შემდეგ ვიხილეთ ოთხი სიქველი, ორი სერიალი, ტიმ ბარტონის 2001 წლის რიმეიქი და 2011 წლის წარმატებული რებუთ-ტრილოგია.

ენდი სერკისი კეისრის როლში, ფილმიდან მაიმუნების პლანეტის განთიადი, 2014 წელი

ფოტო: David James/20th Century Fox

ბოლო ფილმმა, მაიმუნების პლანეტის სამეფომ, რომლის რეჟისორი ვეს ბოლი იყო, კრიტიკოსებისა და მაყურებლის დიდი მოწონება დაიმსახურა და გლობალურად 397 მილიონი დოლარი გამოიმუშავა.

შემოქმედებითი გუნდი

მეტ შეკმანი Disney-სთვის საყვარელ რეჟისორად იქცა მას შემდეგ, რაც Marvel-ის სერიალ WandaVision-ისთვის ემის ნომინაცია მოიპოვა. სწორედ ამ წარმატებამ მოუტანა მას ფანტასტიკური ოთხეულის რეჟისორის სკამი. ამ უკანასკნელის პრემიერა გასულ ზაფხულს შედგა და 521 მილიონი დოლარი დააგროვა.

რაც შეეხება ჯოშ ფრიდმანს, მას 20th Century Studios-თან მუშაობის დიდი გამოცდილება აქვს: ის ისეთი ბლოკბასტერების თანასცენარისტია, როგორიცაა ავატარი: წყლის გზა, ავატარი: ცეცხლი და ფერფლი და მაიმუნების პლანეტის სამეფო.