საქართველოს პროკურატურამ არასრულწლოვანი შვილის დამამძიმებელ გარემოებებში განზრახ მკვლელობის ფაქტზე დაკავებულ პირს ბრალი წარუდგინა. ინფორმაციას საქართველოს პროკურატურა ავრცელებს.

პროკურატურის ინფორმაციით, შინაგან საქმეთა სამინისტროს მიერ ჩატარებული გამოძიებით დადგინდა, რომ 31 მაისს, ბოლნისის მუნიციპალიტეტის ერთ-ერთ სოფელში, ბრალდებულმა საკუთარ 7 წლის შვილს ბასრი საგნით სიცოცხლისთვის სახიფათო, მძიმე დაზიანებები მიაყენა. მიღებული დაზიანებების შედეგად არასრულწლოვანი საავადმყოფოში გარდაიცვალა.

სამართალდამცველებმა ბრალდებული 1 ივნისს დააკავეს. მას ბრალი საქართველოს სისხლის სამართლის კოდექსის 11 პრიმა 109-ე მუხლის "ე" და "კ" ქვეპუნქტებით წარედგინა, რაც არასრულწლოვანი ოჯახის წევრის მიმართ ჩადენილ განზრახ მკვლელობას გულისხმობს.

აღნიშნული დანაშაული 20 წლამდე ან უვადო თავისუფლების აღკვეთას ითვალისწინებს.

პროკურატურის ცნობით, მიმდინარე გამოძიების ფარგლებში ბრალდებულს ფსიქიატრიული ექსპერტიზა ჩაუტარდება. უწყება ასევე სასამართლოს კანონით დადგენილ ვადაში მიმართავს და მისთვის აღკვეთის ღონისძიების სახით პატიმრობის შეფარდებას მოითხოვს.

ცნობისთვის, ბოლნისში 42 წლის ქალმა 7 წლის შვილი ცივი იარაღით მოკლა. რეგიონული მედიის, Aktual.ge-ს ინფორმაციით, ფაქტის შემდეგ ოჯახის წევრებმა მომხდარის დამალვა სცადეს. არაოფიციალური ინფორმაციით, ქალს ფსიქიკური ჯანმრთელობის პრობლემები აქვს.