სერიალი House of the Dragon, რომლის მთავარი რეჟისორები რაიან კონდალი და მიგელ საპოჩნიკი არიან, ეკრანებზე პირველად 2022 წლის 21 აგვისტოს გამოჩნდა. პროექტი საკულტო სერიალის, Game of Thrones პრიქველია. სერიალში მოვლენები Game of Thrones-მდე დაახლოებით 200 წლით ადრე ვითარდება.

მეორე სეზონში მოვლენები "მწვანეებისა" (ალისენტი, ეიგონი, ეიმონდი და ა.შ.) და "შავების" (რეინირა, ჯაკერისი, რეინისი) გარშემო ვითარდებოდა, რომლებიც ცალ-ცალკე ემზადებოდნენ ომისთვის. დეიმონი კი მთელი სეზონის განმავლობაში ჰარენჰოლში იყო გამოკეტილი და ჯარს აგროვებდა.

სანამ ყველანი მესამე სეზონის პრემიერას ველოდებით, მოდით, გადავხედოთ იმ ყველაფერს, რაც მესამე სეზონზე ვიცით:

რას უნდა ველოდოთ House of the Dragon-ის მესამე სეზონიდან?

მიუხედავად იმისა, რომ HBO-ს მესამე სეზონის ოფიციალური სინოფსისი ჯერ არ გამოუქვეყნებია, მეორე სეზონი ზუსტად იქ დასრულდა, სადაც წიგნის, ცეცხლი და სისხლის, ერთ-ერთი ყველაზე მასშტაბური ბრძოლა უნდა დაიწყოს. შოურანერმა რაიან კონდალმაც დაადასტურა, რომ ეს მოვლენები სერიალის მესამე სეზონის პრემიერიდან "ძალიან მალე" განვითარდება.

"ბრძოლა სერიალში ძალიან მალე მოხდება. თუ გავითვალისწინებთ იმას, რაც აქამდე გაგვიკეთებია, ბრძოლა ყველაზე გრანდიოზული რამ უნდა იყოს, რაც კი ოდესმე გადაგვიღია. უბრალოდ გვინდოდა, გვქონოდა დრო და სივრცე, რათა ყველაფერი იმ დონეზე გაგვეკეთებინა, რაც ფანებს აღაფრთოვანებდა და მათ მოლოდინებს გაამართლებდა", — განაცხადა რაიან კონდალმა.

რომელი მსახიობები ითამაშებენ House of the Dragon-ის მესამე სეზონში?

მესამე სეზონში ნაცნობი მსახიობების უმრავლესობა კვლავ დაბრუნდება. მათ შორის, მეტ სმიტს, ემა დ’არსს, ოლივია ქუქს, სტივ ტუსენს და სხვა ცნობილ სახეებს მაყურებელი სერიალში კვლავ იხილავს.

გარდა ამისა, მესამე სეზონში რამდენიმე ახალ მსახიობსაც შევხვდებით:

• ჯეიმს ნორტონი — ლორდ ორმუნდ ჰაიტაუერის როლში;
• დენ ფოგლერი — სერ თორჰენ მანდერლის როლში;
• ტომი ფლანაგანი — ლორდ როდერიკ დასტინის როლში;
• ბარი სლოუნი — სერ ადრიან რედფორტის როლში;
• ტომ კალენი — სერ ლუთორ ლარჯენტის როლში;
• ჯოპლინ სიბტეინი — სერ ჯონ როქსტონის, მეტსახელად "მამაცის" როლში.

იმის გათვალისწინებით, რომ მეორე სეზონში რეინისი დაიღუპა, ნაკლებად სავარაუდოა, რომ მისი როლის შემსრულებელი, ივ ბესტი, სერიალში რაიმე მნიშვნელოვანი სახით დაბრუნდეს.

როდის გამოვა და რამდენი სერიისგან შედგება მესამე სეზონი?

House of the Dragon-ის მესამე სეზონის პრემიერა კვირას, 21 ივნისს, HBO-ს ეთერში შედგება. ცნობილია, რომ სერიალის მესამე სეზონში სულ რვა სერიას ვიხილავთ.

მანამდე კი ნახეთ ტრეილერი: