"ჩემი სანქცირება არის პოლიტიკური გადაწყვეტილება. ის, რომ მეკავოს გენერალური აუდიტორის თანამდებობა, არანაირ პრობლემას არ წარმოადგენს", — ამის შესახებ გენერალურმა აუდიტორმა, გიორგი გაბიტაშვილმა საფინანსო-საბიუჯეტო კომიტეტის სხდომაზე განაცხადა, სადაც ის ანგარიშს წარადგენდა. მისი თქმით, სანქცირება "არც სამართლებრივ და არც ფაქტობრივ მტკიცებულებას არ წარმოადგენს".

"ჩემი სანქცირება არის პოლიტიკური გადაწყვეტილება და სტრასბურგის სასამართლოს განმარტებით, ეს არც სამართლებრივ და არც ფაქტობრივ მტკიცებულებას არ წარმოადგენს. ასე რომ, ის, რომ მეკავოს გენერალური აუდიტორის თანამდებობა, არანაირ პრობლემას არ წარმოადგენს.

მე სანქცირებული ვიყავი, როდესაც პარლამენტმა მხარი დამიჭირა, რაც ადასტურებს იმას, რომ საქართველოს პარლამენტს აქვს ნდობა ჩემს მიმართ და იმ ინსტიტუციის მიმართ, რომელსაც მე ვხელმძღვანელობ", — თქვა გაბიტაშვილმა.

მანამდე მან უწყების 2025 წლის საქმიანობის ანგარიში წარადგინა. ანგარიშის მიხედვით, გასულ წელს უწყებამ სულ 44 აუდიტი ჩაატარა:

• 26 — შესაბამისობის;
• 10 — ეფექტიანობის;
• 5 — ფინანსური (აქედან 1 უპირობო მოსაზრებით შეფასდა, 3 — პირობითით, ხოლო 1 — უარყოფითით);
• 3 — უწყებათაშორისი შესაბამისობის.

ჩატარებული ფინანსური შემოწმებებით უწყებამ 28.5 მილიარდ ლარზე მეტი დაფარა, რაც ქვეყნის ნაერთი ბიუჯეტის 95%-ს შეადგენს.

2025 წლის აუდიტორული შემოწმებების შედეგად ჯამში 36.5 მილიონი ლარის მოცულობის დარღვევები გამოვლინდა. გენერალური აუდიტორის განცხადებით, ეს ნაკლოვანებები სისტემურ ხასიათს ატარებს და ძირითადად უკავშირდება სახელმწიფო შესყიდვებს, აქტივების მართვასა და საბიუჯეტო რესურსების არაეფექტიან, არაეკონომიურ ან არამიზნობრივ ხარჯვას.

ამასთანავე, გაცემული რეკომენდაციების წყალობით, ბიუჯეტში ზედმეტად გადახდილი თანხები დაბრუნდა, დაიზოგა ან დამატებითი შემოსავლების სახით მობილიზდა სულ 11.8 მილიონი ლარი.

"სამსახურის მიერ ჩატარებული, რეალურ დროში აუდიტის ფარგლებში განხორციელებული შესწავლის შედეგად, სატენდერო დოკუმენტაციაში არსებული ხარვეზებისა და არასწორად განსაზღვრული საჭიროებების გამო, 9.2 მილიონი ლარის ღირებულების ტენდერი შეწყდა. შესაბამისად, თავიდან იქნა აცილებული საბიუჯეტო რესურსების არაეკონომიური გამოყენება", — აღნიშნა გიორგი გაბიტაშვილმა.

მაღალი რისკის შემცველი გარემოებების გამოვლენის გამო, შემდგომი რეაგირებისთვის საგამოძიებო პროკურატურას 17 აუდიტის მასალები გადაეგზავნა, რომელთა ჯამური თანხა 80 მილიონ ლარს შეადგენს. პროკურატურამ 4 მასალა უკვე მიმდინარე სისხლის სამართლის საქმეებს დაურთო, ხოლო 13 შემთხვევაზე ახალი გამოძიება დაიწყო.

საქმიანობის ანგარიში ასევე მოიცავდა ინფორმაციას უწყების შიდა მმართველობის გაძლიერების, ფინანსების მართვის, თანამშრომელთა პროფესიული განვითარებისა და მთავარ პარტნიორებთან თანამშრომლობის შესახებ.