ისრაელის სახელმწიფოში საქართველოს საგანგებო და სრულუფლებიან ელჩად ბექა დვალი დაინიშნა. ინფორმაციას ამის შესახებ საქართველოს საგარეო საქმეთა სამინისტრო ავრცელებს.

უწყების ცნობით, ახალდანიშნულ ელჩს საგარეო საქმეთა სამინისტროს ცენტრალურ აპარატსა და საზღვარგარეთ საქართველოს დიპლომატიურ მისიებში მუშაობის მრავალწლიანი გამოცდილება აქვს და მას მინიჭებული აქვს საგანგებო და სრულუფლებიანი ელჩის დიპლომატიური რანგი.

ბექა დვალი 2022 წლიდან დღემდე იკავებდა საქართველოს საგანგებო და სრულუფლებიანი ელჩის პოზიციას ავსტრალიის თანამეგობრობაში. მანამდე კი, 2012-2022 წლებში, ის ხელმძღვანელობდა საქართველოს დიპლომატიურ მისიას სამხრეთ აფრიკის რესპუბლიკაში.

სხვადასხვა პერიოდში ბექა დვალი ასევე მუშაობდა შემდეგ საპასუხისმგებლო პოზიციებზე:

  • საგანგებო და სრულუფლებიანი დესპანი დიდი ბრიტანეთისა და ჩრდილოეთ ირლანდიის გაერთიანებულ სამეფოში;

  • ამერიკის შეერთებულ შტატებში საქართველოს საელჩოს უფროსი მრჩეველი;

  • საქართველოს საგარეო საქმეთა სამინისტროს ევროინტეგრაციის დეპარტამენტის დირექტორის მოადგილე;

  • საგარეო უწყების საერთაშორისო ორგანიზაციების დეპარტამენტის გაეროს სამმართველოს უფროსი.