ინგლისელმა პოპვარსკვლავმა დუა ლიპამ, რომელიც ლიტერატურის განსაკუთრებული სიყვარულითაც გამოირჩევა, წიგნების ცენზურასთან დაპირისპირება გადაწყვიტა. გრემის მფლობელმა მუსიკოსმა პორტუგალიის ქალაქ პორტუში, ლივრარია ლელუს წიგნის მაღაზიის ისტორიულ შენობაში ბიბლიოთეკა გახსნა. "ბიბლიოთეკა მანიფესტი", როგორც მას უწოდეს, აკრძალულ წიგნებს აერთიანებს და ცენზურასთან ერთად, "ძალაუფლებასა და დომინანტურ ნარატივებს" ეწინააღმდეგება.

ბიბლიოთეკა წიგნის საერთაშორისო ფესტივალის ფარგლებში გაიხსნა. დუა ლიპას ინიციატივას მისივე შექმნილი პროექტი Service95 ახორციელებს, რომლის ერთ-ერთი მიმართულება წიგნის კლუბია. კლუბი ყოველთვიურად ირჩევს საკითხავ წიგნს, შემდგომ კი მის ავტორთან ლიპა ინტერვიუს წერს.

"როცა Service95-ის წიგნის კლუბი შევქმენი, ჩემი სურვილი იყო, მას მწერლები და მკითხველები საზღვრებს მიღმა გაეერთიანებინა", — აღნიშნავს მომღერალი, — "კითხვა ერთმანეთთან უფრო გვაახლოებს, მაგრამ ამის მომხრე, სამწუხაროდ, ყველა არაა. [ბიბლიოთეკაში] თქვენ შეხვდებით ას წიგნს, რომლებიც კითხვებს სვამს, ან თავად აღმოჩენილა კითხვის ნიშნის ქვეშ. ზოგიერთი მათგანი საგანმანათლებლო უწყებებმა იმის გამო აკრძალეს, რომ რასობრივ ან სექსუალობის თემატიკას შეეხება. სხვები, ლგბტქ მკითხველებისთვის განკუთვნილი წიგნები, დახლებიდან ჩამოიღეს. არის შემთხვევებიც, როცა მწერალმა თავისი სიტყვებისთვის საკუთარი სიცოცხლით ზღო.

"ეს ბიბლიოთეკა არის ტაძარი წიგნებისთვის, რომლებიც გაქრა, მწერლებისთვის, რომელთა გაბედულება ძალაუფლებისა და ბატონობის სისტემებს ფარდას ხდის, და მკითხველებისთვის, რომლებიც არ ემორჩილებიან მითითებას, თუ რა წიგნის წაკითხვაა ნებადართული. გეპატიჟებით ამ ბიბლიოთეკაში, სადაც თავად გადაწყვეტთ, რომელი წიგნების ადგილია თაროებზე. რადგან ზოგჯერ ყველაზე რევოლუციური ნაბიჯი წიგნის წაკითხვა და მასზე საუბარია".

ბიბლიოთეკაში განთავსებული წიგნების ასეულში ისეთ ცნობილ ავტორებსაც აღმოაჩენთ, როგორებიც არიან მარგარეტ ეტვუდი, სალმან რუშდი და ოლგა ტოკარჩუკი.

ლივრარია ლელუს ხელმძღვანელობის თქმით, მათი წიგნის მაღაზია უკვე 120 წელია, ერთ რწმენას ეფუძნება: რომ წიგნი თავისუფლების მექანიზმია.

"ახლა კი, საფრთხის წინაშე არა მხოლოდ წიგნების ბედია, არამედ საზოგადოების შესაძლებლობაც, წარმოიდგინოს და შექმნას საკუთარი მომავალი", — ამატებენ წიგნის მაღაზიაში.