ბაზისბანკის მხარდაჭერითა და საქართველოს საბანკო ასოციაციის თანაორგანიზებით საქართველოს ეკონომიკის ასოციაციის II საერთაშორისო კონფერენცია გაიმართა.

ღონისძიება მნიშვნელოვანი საერთაშორისო აკადემიური პლატფორმაა. მასში ადგილობრივი და მსოფლიოს წამყვანი უნივერსიტეტებისა და კვლევითი ინსტიტუტების 50-ზე მეტმა მომხსენებელმა მიიღო მონაწილეობა.

მსგავსი მასშტაბისა და მნიშვნელობის აქტივობები განსაკუთრებულ როლს ასრულებს აკადემიურ წრეებს შორის თანამშრომლობის გაღრმავებაში, თანამედროვე ეკონომიკური გამოწვევების განხილვასა და იმ ცოდნის გაზიარებაში, რომელიც ეკონომიკური განვითარების, ფინანსური სტაბილურობისა და მდგრადი ზრდის ხელშეწყობას ემსახურება.

კონფერენციის ფარგლებში გაიმართა პანელური დისკუსია თემაზე — ფინანსური განვითარება და ეკონომიკური ზრდა. დისკუსია დაეთმო ფინანსური სექტორისა და ეკონომიკური განვითარების ურთიერთკავშირს, ფინანსური სისტემების გავლენას ინვესტიციებსა და მდგრად განვითარებაზე, ასევე საქართველოს ეკონომიკურ გარემოში ფინანსური სექტორის წინაშე არსებულ გამოწვევებსა და შესაძლებლობებს.

დისკუსიის მონაწილეები ეკონომიკური სისტემის სხვადასხვა სეგმენტს წარმოადგენდნენ და საკითხს განსხვავებული კუთხით განიხილავდნენ. პანელურ დისკუსიაში კომერციული ბანკების, საქართველოს ეროვნული ბანკის, სახელმწიფო კორპორაციისა და აკადემიური წრის წარმომადგენლები მონაწილეობდნენ.

პანელს საქართველოს საბანკო ასოციაციის პრეზიდენტი ალექსანდრე ძნელაძე გაუძღვა, ხოლო მომხსენებლები იყვნენ ვატო ბაბუნაშვილი (ლიბერთი, ბაზისბანკის ჰოლდინგი), გიორგი ბაქრაძე (პროკრედიტ ბანკი), დავით უტიაშვილი (საქართველოს ეროვნული ბანკი), ირაკლი გაბრიაძე (საქართველოს ეკონომიკის განვითარების კორპორაცია) და ჯოზეფ კაბოსკი (ნოტრდამის უნივერსიტეტი).