საფრანგეთის პარლამენტში დღეს, 21 ივლისს კენჭს უყრიან კანონპროექტს, რომელიც 15 წლამდე ასაკის ბავშვებისთვის სოციალური მედიით სარგებლობის აკრძალვას ითვალისწინებს. ინიციატივა, რომელსაც მოზარდების ნაწილი ეწინააღმდეგება, მშობლებისა და პედაგოგების მხარდაჭერით სარგებლობს. ინფორმაციას Reuters ავრცელებს.

კანონპროექტის მიღების შემთხვევაში, საფრანგეთი გახდება მორიგი ქვეყანა ავსტრალიის შემდეგ, სადაც გასული წლის დეკემბერში 16 წლამდე მოზარდებს ისეთ პლატფორმებზე წვდომა აეკრძალათ, როგორებიცაა Facebook, Snapchat, TikTok და YouTube. გადაწყვეტილების მთავარი მიზეზი არასრულწლოვნების ფსიქიკურ ჯანმრთელობასა და უსაფრთხოებაზე სოციალური ქსელების მავნე გავლენაა.

საფრანგეთის პრეზიდენტს, ემანუელ მაკრონს სურს, რომ ახალი რეგულაცია ძალაში ახალი სასწავლო წლის დასაწყისიდან, 1-ელი სექტემბრიდან შევიდეს.

როგორ იმუშავებს შეზღუდვა?

კანონპროექტის ტექსტზე სენატორები და დეპუტატები უკვე შეთანხმდნენ. კანონის მიხედვით:

• 1-ელი სექტემბრიდან 15 წლამდე ასაკის მოზარდები ვეღარ შეძლებენ სოციალურ ქსელებში ახალი ანგარიშების გახსნას.
  
  
• სოციალური მედიის კომპანიებს 4-თვიანი ვადა მიეცემათ უკვე არსებული ანგარიშების დასახურად.
  
  
• პლატფორმებს დაევალებათ ასაკის გადამოწმების სპეციალური სისტემების დანერგვა, რომლებსაც საფრანგეთის პერსონალურ მონაცემთა დაცვის სააგენტო დაამტკიცებს.
  
  
• შეზღუდვა არ გავრცელდება ონლაინ ენციკლოპედიებსა და საგანმანათლებლო პორტალებზე.

საფრანგეთის პრეზიდენტმა აპრილში, ერთ-ერთ სკოლაში სტუმრობისას, ახალგაზრდებს მოუწოდა, მეტი დრო დაუთმონ წიგნების კითხვას და შეამცირონ ტელეფონებთან გატარებული დრო.

"ჩვენ მიგატოვეთ ამ ჯუნგლებში და მან მოგპარათ ყურადღება. გჭირდებათ შენელება და დახმარება, რომ გახდეთ მოზრდილები და, უპირველეს ყოვლისა, მოქალაქეები. სწორედ ამიტომ, გვინდა ვთქვათ, რომ 15 წლამდე — აღარანაირი სოციალური მედია", — განაცხადა ემანუელ მაკრონმა.

სოციალური მედიის კომპანიები აცხადებენ, რომ ეწინააღმდეგებიან მკაცრ აკრძალვებს და ამჯობინებენ არსებული უსაფრთხოების მექანიზმების დახვეწას, თუმცა ადასტურებენ, რომ სახელმწიფოების მიერ მიღებულ კანონებს დაემორჩილებიან.

ამავდროულად, ევროკომისია მუშაობს საკუთარ ჩარჩო რეგულაციებზე სოციალური ქსელების ბიზნესმოდელების შესაზღუდად. სწორედ ევროკომისიამ უნდა შეაფასოს, რამდენად შეესაბამება საფრანგეთის ახალი კანონპროექტი ევროკავშირის საერთო კანონმდებლობას.