პირადი ცხოვრების ამსახველი ფოტომასალის უკანონოდ მოპოვებისა და გავრცელების ფაქტზე დაკავებული პირი შსს-ის ყოფილი თანამშრომელია — ინფორმაციას "ტვ პირველი" ავრცელებს.

მათი ცნობით, ხობის პოლიციის ყოფილი თანამშრომელი დანაშაულებრივ ქმედებებს უწყებაში მუშაობის პერიოდში ახორციელებდა. მას შემდეგ კი, რაც მის მიმართ გამოძიება დაიწყო, თანამდებობა დატოვა.

"სანამ დააკავებდნენ, დაახლოებით ერთი თვით ადრე გაუშვეს სამსახურიდან. ვერ გეტყვით, გაუშვეს თუ არა ამ ამბის გამო. პირადი განცხადება თვითონ დაწერა და წავიდა. [ბრალდებული] საკუთარი სახლიდან აიყვანეს. ამჟამად დუმილის უფლებას იყენებს," — განაცხადა მისმა ადვოკატმა, სოსო ჯანაშიამ.

"ტვ პირველის" ცნობით, ზუგდიდის რაიონულ სასამართლოში დღეს ჩანიშნულ ორიცესზე უნდა გაირკვეს, ფიგურირებს თუ არა ამ საქმეში ერთ-ერთი ესთეტიკური მედიცინის ცენტრი, სადაც ქალებს, სავარაუდოდ, ფარულად უღებდნენ.

28 ივლისს პროკურატურამ გაავრცელა ინფორმაცია იმის შესახებ, რომ პირმა WhatsApp-ის გამოყენებით მოიპოვა და უკანონოდ შეინახა სამი დაზარალებულის პირადი ცხოვრების საიდუმლოს ამსახველი ფოტო მასალა, ხოლო ერთ-ერთის პირადი ცხოვრების საიდუმლოს ამსახველი ფოტომასალა Messenger-ის საშუალებით სხვა 3 პირს გადაუგზავნა.

გამოძიების თანახმად, ბრალდებული სისტემატურად უკანონოდ უთვალთვალებდა ერთ-ერთ დაზარალებულს, გადაადგილდებოდა მისი საცხოვრებელი სახლის მიმდებარე ტერიტორიაზე და მასთან არასასურველ კომუნიკაციას ამყარებდა.

პროკურატურის თანამშრომლებმა ბრალდებული მოსამართლის განჩინების საფუძველზე 27 ივლისს დააკავეს. მას ბრალდება საქართველოს სისხლის სამართლის კოდექსის 157¹ მუხლის პირველი ნაწილით (პირადი ცხოვრების საიდუმლოს ამსახველი ინფორმაციის უკანონო შენახვა და გავრცელება) და 151¹ მუხლის მე-2 ნაწილის "დ" ქვეპუნქტით (ადევნება) წარედგინა, რაც სასჯელის სახედ და ზომად 7 წლამდე თავისუფლების აღკვეთას ითვალისწინებს.