ერთიანი ნაციონალური მოძრაობის ყრილობა 5 აგვისტოს, 15:00 საათზე, გაიმართება. ამის შესახებ ჟურნალისტებს "ნაციონალური მოძრაობის" ერთ-ერთმა ლიდერმა, პეტრე ცისკარიშვილმა ენმ-ს პოლიტსაბჭოს სხდომის დასრულების შემდეგ უთხრა.

"ეს არ იქნება გრანდიოზული ყრილობა, მორიგი ტექნიკური ყრილობაა. დელეგატების რაოდენობა დაახლოებით 250-დან 300 კაცამდე განისაზღვრა. ამ დელეგატების მოწვევის წესიც დადგინდა და განისაზღვრა. დედაქალაქიდან, რეგიონებიდან, ასევე, ცენტრალური ოფისი წარმოადგენს დელეგატების ნაწილს. ...დაინიშნა საორგანიზაციო ჯგუფი, რომელიც ყრილობის ორგანიზებისა და ჩატარებისთვის აუცილებელი და მნიშვნელოვანი ფაქტორი და ერთ-ერთი ასპექტია. ამ ორგანიზაციის შემადგენლობის რაოდენობა განისაზღვრა 7 ადამიანით", — განაცხადა პეტრე ცისკარიშვილმა.

მოქმედი თავმჯდომარე თინათინ ბოკუჩავა ენმ-ის პოლიტსაბჭოს სხდომას არ დასწრებია — ის აჭარაში იმყოფება. კითხვაზე — რატომ არ გადადო პარტიამ პოლიტსაბჭოს სხდომა, რომ მას თავმჯდომარეც დასწრებოდა, ცისკარიშვილმა უპასუხა, რომ "ყველას ლოჯისტიკურ გეგმებს ვერ მოერგებოდნენ". დაესწრება თუ არა თინათინ ბოკუჩავა 5 აგვისტოს ყრილობას, ცისკარიშვილმა არ იცის.

"თინა არ გახლავთ ქალაქში და, აქედან გამომდინარე, მოსვლა ვერ მოახერხა. სამწუხაროდ, ამ კალენდარული მოცემულობიდან გამომდინარე, პოლიტსაბჭოს ყველა წევრი არ იმყოფება ქალაქში. ბევრმა ვერ მოახერხა მობრძანება... ყრილობა, შესაბამისად, იმ დროს გაიმართება, როდესაც ბოკუჩავა ქალაქში იქნება.

პოლიტსაბჭოს სხდომის ჩატარება საორგანიზაციო ეტაპია. ჩვენ ასე ვერ მოვერგებით ყველას ლოჯისტიკურ გეგმებს, გადაადგილებებს, ქალაქში ყოფნა-არყოფნას," — განაცხადა ცისკარიშვილმა.

შეგახსენებთ, რომ ყრილობაზე ერთიანი ნაციონალური მოძრაობა ახალ თავმჯდომარეს აირჩევს.