30 ივლისს ნაციონალურმა მოძრობამ პოლიტსაბჭოს სხდომა გამართა, რომელსაც პარტიის მოქმედი თავმჯდომარე თინათინ ბოკუჩავა არ დასწრებია. ენმ-ის წევრმა, პეტრე ცისკარიშვილმა სხდომის დასრულების შემდეგ "ტვ პირველის" ჟურნალისტთან საუბრისას თქვა, რომ "ყველას ლოჯისტიკურ გეგმებს ვერ მოერგებოდნენ".

"ენმ-ის პოლიტსაბჭოს სხდომის შემდეგ თინათინ ბოკუჩავამ პირველი კომენტარი გააკეთა. ის აცხადებს, რომ ერთი კვირით გასულია ქალაქიდან და ამის შესახებ ინფორმირებული იყო პარტიის გენერალური მდივანი.

"ერთი კვირით ოჯახთან ერთად გასული ვარ ქალაქიდან. აღნიშნულის შესახებ ჯერ კიდევ ორი-სამი კვირის წინ ვაცნობე პარტიის გენერალურ მდივანს, შესაბამისად, გუშინდელი პოლიტიკური საბჭოს სხდომის ორგანიზატორები ინფორმირებულნი იყვნენ ამის შესახებ. რატომ იჩქარეს პოლიტიკური საბჭოს სხდომის დანიშვნა და შემდგომ ყრილობის დანიშვნა — ამ კითხვის ადრესატები, ჩემი აზრით, სხვა ადამიანები უნდა იყვნენ. უბრალოდ, გუშინ ძალიან ბევრი ჟურნალისტისგან მივიღე ზარი თუ ტექსტური შეტყობინება ამ კითხვით და, ბუნებრივია, არ მინდოდა უყურადღებოდ დამეტოვებინა თავისუფალი მედიის ჟურნალისტების კითხვები, ამიტომ ჩავთვალე საჭიროდ, რომ მომეხდინა საზოგადოების ინფორმირება იმასთან დაკავშირებით, რომ არ ვიმყოფები ქალაქში, თუმცა ეს წინსწრებად მქონდა დაგეგმილი და ამის შესახებ ინფორმირებული იყო პარტიის გენერალური მდივანი და, შესაბამისად, ის ადამიანები, ვინც დააორგანიზეს გუშინდელი პოლიტიკური საბჭოს სხდომა", — აცხადებს ბოკუჩავა.

უცნობია დაესწრება თუ არა თინათინ ბოკუჩავა ენმ-ის ყრილობას, რომელიც 5 აგვისტოს 15:00 საათზეა დაგეგმილი.