სტუდია "მონიტორის" Facebook-გვერდი გაითიშა. ინფორმაციას "რადიო თავისუფლება" ავრცელებს.

სოციალური ქსელის მხრიდან შეზღუდვის მიზეზად "საავტორო უფლებების დარღვევა" სახელდება, რაც "მონიტორის" ჟურნალისტის მარიკა დუდუნიას მიერ გამოქვეყნებული პოსტიდან ხდება ცნობილი. თავად ჟურნალისტები ამ მიზეზს კატეგორიულად გამორიცხავენ.

"რადიო თავისუფლება" წერს, რომ მსგავსი შემთხვევა გასულ კვირასაც მოხდა, როდესაც დროებით შეიზღუდა "მონიტორის" YouTube-არხის ფუნქციონირებაც, თუმცა მოგვიანებით მისი აღდგენა მოხერხდა. იმ შემთხვევაშიც პლატფორმა "საავტორო უფლებების დარღვევას" ედავებოდათ, თუმცა, როგორც გამოცემის რედაქტორი ნინო ზურიაშვილი ამბობს, დასახელებული არ ყოფილა, თუ კონკრეტულად რომელი მასალა არღვევდა უფლებებს.

აღსანიშნავია, რომ საგამოძიებო გუნდის ბოლო მასალა საქართველოში მოქმედ "ქოლცენტრებს" ეხება.

როგორც ზურიაშვილი "რადიო თავისუფლებასთან" საუბრისას აღნიშნავს, ისინი საერთაშორისო პარტნიორების დახმარებით ყველაფერს აკეთებენ, რათა ფეისბუკ-გვერდის წვდომა რაც შეიძლება სწრაფად აღდგეს.

"ეს ბრძოლის ახალი მეთოდია... დარწმუნებული ვარ, გვერჩის ის ხალხი, ვისზეც ტარდება ჟურნალისტური გამოძიებები", — განაცხადა მან.

შეგახსენებთ, რომ სტუდია "მონიტორი" 2005 წლის 14 დეკემბერს დაფუძნდა. დაარსებიდან დღემდე მათ რამდენიმე ასეული ჟურნალისტური გამოძიება და სიღრმისეული რეპორტაჟი აქვთ მომზადებული.