რუსთაველის გამზირზე, სარეაბილიტაციო სამუშაოების დროს, სატვირთო ავტომობილი გადაბრუნდა, რომელშიც მცირეწლოვანი ბავშვი იმყოფებოდა — ვიდეოკადრებს მედიასაშუალება "ინფორადიო" ავრცელებს. მედიის ინფორმაციით, არასრულწლოვანის ჯანმრთელობას საფრთხე არ ემუქრება და მისი ამოყვანა უვნებლად შეძლეს.

მომხდარს "ჯორჯიან უოთერ ენდ ფაუერი" (GWP) გამოეხმაურა. GWP-ის ცნობით, ავტომანქანას მათი კონტრაქტორი კომპანიის მძღოლი მართავდა. კომპანია ადასტურებს სატვირთო მანქანაში მცირეწლოვანის ყოფნას და მომხდარს აფასებს, როგორც "შრომის უსაფრთხოების ნორმებისა და სახელშეკრულებო პირობების უხეშ დარღვევას".

განცხადებაში ვკითხულობთ, რომ GWP მომხდარზე შესაბამის სამართლებრივ ზომებს მიმართავს:

"რუსთაველის გამზირზე წყალმომარაგების ქსელზე სარეაბილიტაციო სამუშაოების მიმდინარეობისას, ჯივიპის კონტრაქტორი კომპანიის თვითმცლელმა ავტომანქანამ ტრანშეის კიდესთან ახლოს იმოძრავა, რამაც ნიადაგის ჩამოშლა და ტექნიკის მოცურება გამოიწვია. მძღოლის მიერ სატრანსპორტო საშუალების დამოუკიდებლად გამოყვანის მცდელობისას ტრანშეის კიდე დამატებით დაზიანდა და ავტომანქანა გადაბრუნდა.

ინციდენტის შედეგად არავინ დაშავებულა. ობიექტზე სამუშაო პროცესი შეუფერხებლად, ჩვეულ რეჟიმში გრძელდება.

"ჯორჯიან უოთერ ენდ ფაუერი" ხაზგასმით აღნიშნავს, რომ გამოვლინდა შრომის უსაფრთხოების ნორმებისა და სახელშეკრულებო პირობების უხეში დარღვევა — თვითმცლელში იმყოფებოდა მცირეწლოვანი ბავშვი.

ჯივიპის შესაბამისი სამსახურები ადგილზე დეტალურად იკვლევენ ფაქტს დაზუსტების მიზნით. მოკვლევის დასრულებისთანავე, კომპანია კონტრაქტორი ორგანიზაციის მიმართ გაატარებს ხელშეკრულებითა და მოქმედი კანონმდებლობით გათვალისწინებულ სამართლებრივ ზომებს," — ვკითხულობთ განცხადებაში.