იმერეთში პოლიციამ და პროკურატურამ "ქურდულ სამყაროსთან" კავშირში მყოფი ჯგუფი გამოავლინა. ოპერაციის შედეგად 4 პირი უკვე დაკავებულია, ხოლო 2 პირს ბრალს დაუსწრებლად წარუდგენენ. ინფორმაციას შსს ავრცელებს.

ფარული საგამოძიებო მოქმედებებით დადგინდა, რომ ბრალდებულები იმერეთის რეგიონში აქტიურად მონაწილეობდნენ ე.წ. "ქურდულ გარჩევებში".

უწყების ცნობით, შეკრებებზე გადაწყვეტილებებს კრიმინალური მენტალიტეტის მიხედვით იღებდნენ. თუ ვინმე მათ მიერ დაკისრებულ "ვალდებულებებს" ან ვადებს დაარღვევდა, ფიზიკური ანგარიშსწორებით, ჯანმრთელობის დაზიანებითა და სიცოცხლის მოსპობით ემუქრებოდნენ.

გამოძიება "ქურდულ სამყაროსთან" დაკავშირებული მუხლებით მიმდინარეობს, რაც 15 წლამდე პატიმრობას ითვალისწინებს.

"შინაგან საქმეთა სამინისტროს იმერეთის პოლიციის დეპარტამენტის თანამშრომლებმა, პროკურატურასთან ერთად, კომპლექსურად ჩატარებული ოპერატიული ღონისძიებებისა და საგამოძიებო მოქმედებების შედეგად, მოსამართლის განჩინების საფუძველზე, "ქურდულ სამყაროსთან" კავშირში მყოფი 4 პირი დააკავეს, ხოლო 2 პირს ბრალი დაუსწრებლად წარედგინება.

სამართალდამცველების მიერ, მოსამართლის განჩინების საფუძველზე ჩატარებული ფარული საგამოძიებო მოქმედებების შედეგად დადგინდა, რომ სისხლის სამართლის დანაშაულში ბრალდებული პირები, იმერეთის რეგიონში აქტიურად მონაწილეობდნენ "ქურდულ გარჩევებში".

გამოძიებით ასევე, დგინდება, რომ ბრალდებულები შეკრებებზე ე.წ. ქურდული ტრადიციების შესაბამისად იღებდნენ გადაწყვეტილებებს, ხოლო დაკისრებული ვალდებულებების შეუსრულებლობის ან კონკრეტული ვადების დარღვევის შემთხვევაში, მათ ფიზიკური ანგარიშსწორებით, ჯანმრთელობის დაზიანებითა და სიცოცხლის მოსპობით ემუქრებოდნენ.

სამართალდამცველებმა, ბრალდებულების პირადი და საცხოვრებელი სახლების ჩხრეკის შედეგად, ნივთმტკიცებად ამოიღეს კომპიუტერული ტექნიკა და მობილური ტელეფონები, რომელთა საშუალებითაც ისინი ერთმანეთს უკავშირდებოდნენ.

გამოძიება საქართველოს სისხლის სამართლის კოდექსის 223-ე პრიმა, 223-ე ტერცია და 223-ე კვარტა მუხლებით მიმდინარეობს, რაც 15 წლამდე ვადით თავისუფლების აღკვეთას ითვალისწინებს", — წერია უწყების განცხადებაში.