კრემლისტური პარტიის სოლიდარობა მშვიდობისთვის ლიდერი, პრორუსი მამუკა ფიფია მთავრობის მეთაურის, ირაკლი კობახიძის ბრიფინგს ეხმაურება, რომელიც საქართველოში "რუსოფობიაზე" საუბარს მიეძღვნა.

ფიფიამ მოიწონა კობახიძის განცხადება გეორგიევსკის ტრაქტატის შესახებ და მაგალითად მოიყვანა თავისი პარტიის 2 წლის წინანდელი ინიციატივა ტრაქტატის თავიდან დადების თაობაზე.

"მინდა გამოვეხმაურო პრემიერ-მინისტრის ბოლო განცხადებას გეორგიევსკის ტრაქტატის ისტორიულ როლზე.

მიხარია, რომ დღეს ქვეყნის ხელმძღვანელობა იმ რეალობას აცნობიერებს, რომელზეც ჩვენ ჯერ კიდევ ორი წლის წინ ხმამაღლა ვსაუბრობდით.

შეგახსენებთ, რომ ჯერ კიდევ 2 წლის წინ, თელავში, მეფე ერეკლე მეორის ძეგლთან, ჩვენმა პარტიამ საჯაროდ გამოაცხადა, რომ საქართველოს სჭირდება "ახალი გეორგიევსკის ტრაქტატი". მაშინ ჩვენი საზოგადოების ლიბერალურმა ნაწილმა ეს განცხადება ზედაპირულად და პირდაპირი მნიშვნელობით მიიღო, რამაც მათი მხრიდან ჩვეული, ვიწრო პოლიტიკური კრიტიკა გამოიწვია.

თუმცა, რეალურად ეს იყო პირობითი დასახელება. მე მხედველობაში მქონდა და დღესაც ვგულისხმობ სრულიად ახალ, ყოვლისმომცველ და რაც მთავარია — თანასწორუფლებიან ხელშეკრულებას რუსეთის ფედერაციასთან. ჩვენ ვჭირდებით ერთმანეთს. ეს არის ერთადერთი გზა ჩვენი ქვეყნის უსაფრთხოებისა და სუვერენიტეტის რეალური გარანტიებისთვის,” — წერს ფიფია.

ფიფიამ სოციალურ ქსელში გამოქვეყნებულ პოსტში სააგენტო TASS-თან ბრიფინგზე გაკეთებულ განცხადებაზეც ისაუბრა და დასძინა, რომ "მოხარულია, რადგან დღეს ეს სიმართლე სულ უფრო მეტი ადამიანისთვის ხდება აშკარა".

აღნიშნულ ბრიფინგზე ფიფია ღიად ითხოვს ახალი გეორგიევსკის ტრაქტატის გაფორმებას, რადგან მისი განმარტებით, ღმერთმა "ამხელა მართლმადიდებელი რუსეთი" იმიტომ შექმნა, რომ მასთან გავერთიანდეთ.

ფიფიას აზრით, "ათწლეულების განმავლობაში უამრავი თანხა დაიხარჯა" რუსეთ-საქართველოს შორის უთანხმოების ჩამოსაყალიბებლად.

"ჩვენ გვჭირდება ახალი გეორგიევსკის ტრაქტატი. გვჭირდება გეორგიევსკის ტრაქტატი II. სინამდვილეში ეს პირობითი სახელწოდებაა, შეგვიძლია ნებისმიერი რამ დავარქვათ. მთავარია ერთმანეთისკენ ვიმოძრაოთ და ჩვენი ქვეყნები გავაერთიანოთ. იმიტომ, რომ იმ გარემოებების გათვალისწინებით, რაც ახლა ხდება მთლიანად რეგიონში, ჩვენ ისევე, როგორც იმ წლებში, გვჭირდება ერთად ყოფნა.

სიტუაცია ისეთია, რომ ჩვენ ერთმანეთს ძალიან ვჭირდებით. მე ღმერთის მწამს და მჯერა, რომ ამხელა მართლმადიდებელი რუსეთი ღმერთმა იმიტომ არ შექმნა, რომ ჩვენ შორის უთანხმოება იყოს. არიან ადამიანები, რომელთაც სურთ, რომ ჩვენ შორის უთანხმოება იყოს. ამაში ათწლეულობით უამრავი თანხა დაიხარჯა და აი, ეს არის იმის რეზულტატი, რაც ახლა გვაქვს.

და ის, რომ ახლა ამ ვითარებასთან გამკლავება გვიწევს და ღმერთის წყალობით წარმატებით გამოგვდის, იმედი მაქვს, ერთმანეთს კიდევ უფრო დავუახლოვდებით," — ამბობს ფიფია ბრიფინგზე.

შეგახსენებთ, ირაკლი კობახიძეს ბრიფინგზე, რომელიც "რუსოფობიაზე" საუბარს მიეძღვნა, გეორგიევსკის ტრაქტატთან დაკავშირებით კითხვა დაუსვეს.

კობახიძის შეფასებით, გეორგიევსკის ტრაქტატით "ქვეყანა რეალურად გადარჩა". მისი აზრით, ერეკლე II-ს ყველანაირი რისკი წინასწარ ჰქონდა დანახული.