კომუნიკაციების კომისიამ (ComCom) "ტვ პირველი" "მაუწყებლობის შესახებ" კანონის დარღვევისთვის მეორედ, ამჟამად 5 000 ლარით დააჯარიმა.

კომისია "ტვ პირველს" შემდეგი ფრაზების გამოყენებისთვის ედავებოდა — "დიდი ნადირობა მოაწყო", "სქროლვა-სქრინვის სააგენტო", "ჩეჩნური ტიპის რაზმი", "აქტივისტებზე ნადირობა", "პოლიციას ნერვებმა უმტყუნა". კომისიის შეფასებით, აღნიშნული ტერმინოლოგიის გამოყენებით მაუწყებელმა ახალი ამბები პირადი დამოკიდებულების საფუძველზე გააშუქა და ამით კანონით დადგენილი მოთხოვნები დაარღვია.

"ტვ პირველის" იურისტი, თორნიკე მიგინეიშვილი ამბობს, რომ მიღებული გადაწყვეტილება უკანონო და დაუსაბუთებელია:

"რა თქმა უნდა, თვითონ გადაწყვეტილება არ იყო მოულოდნელი. მარეგულირებელ კომისიას კრიტიკული მედიის მიმართ უკვე აქვს იმგვარი გადაწყვეტილებების მიღების პრაქტიკა, რომლებიც არ არის დასაბუთებული და მიზანმიმართულია გამოხატვის თავისუფლების წინააღმდეგ. მათ შორის რამდენიმე გადაწყვეტილება თბილისის საქალაქო სასამართლოშიც გვაქვს გასაჩივრებული, თუმცა ეს ფორმალურია. მიუხედავად იმისა, პროცესი ჩაინიშნება თუ არა სასამართლოში, ვიცით, რა იქნება გადაწყვეტილება.

პროცესები არც ინიშნება — დაახლოებით 4 წლის წინ მარეგულირებელი კომისიის გადაწყვეტილებებთან დაკავშირებით შეტანილი საჩივრები სასამართლოს დღემდე არ განუხილავს. გარდა ამისა, სანქციები, რა თქმა უნდა, მზარდია — თუ ის პირველ ეტაპზე იყო 2 500 — 3 000 — 5 000 ლარი, სამომავლოდ, სავარაუდოდ, კიდევ უფრო მეტი იქნება. რაც ყველაზე მთავარია, ეს მარეგულირებელ კომისიას აძლევს საფუძველს, იმსჯელოს უკვე ლიცენზიის შეჩერებაზე, რაც არა მხოლოდ ტელეკომპანია "პირველისთვის", არამედ ზოგადად ქვეყნისთვის იქნება ერთ-ერთი მძიმე გადაწყვეტილება," — ამბობს ადვოკატი
"ტვ პირველთან".

კომუნიკაციების კომისიამ ტერმინების გამოყენებისთვის ტელეკომპანია 25 ივნისს 2500 ლარით დააჯარიმა.

ComCom აღნიშნა, რომ ვინაიდან მიმდინარე წლის განმავლობაში "ტელეკომპანია პირველის" მიმართ მსგავსი დარღვევისთვის წერილობითი გაფრთხილება უკვე გამოყენებული იყო, აღნიშნული ფაქტი განმეორებით ქმედებად შეფასდა. ამ გარემოების გათვალისწინებით, კომუნიკაციების კომისიამ ტელეკომპანიას კანონით განსაზღვრული მინიმალური ფინანსური სანქცია — 2500 ლარის ოდენობით ჯარიმა დააკისრა.