ზენდეიას სტილისტმა, ლა როუჩმა, ახლახან მიცემულ ინტერვიუში იმის შესახებ ისაუბრა, თუ რატომ არ აძლევს კონკრეტულ ბრენდებს წითელ ხალიჩაზე ზენდეიას ჩაცმის უფლებას. სტილისტმა "პატარა წყენებზე" ისაუბრა, რაც მისივე თქმით, ზენდეიას გარდერობზეც აისახება. თავად როუჩიც ხშირად ექცევა ყურადღების ცენტრში, რადგან ზენდეიას მრავალფეროვანი ჩაცმულობა ყოველთვის დიდ მოწონებასა და აღფრთოვანებას იმსახურებს.

პოდკასტის წამყვანმა სტილისტს მისივე ძველი განცხადება შეახსენა: "შენ არაოფიციალური ბოიკოტი გაქვს გამოცხადებული Saint Laurent-ის, Dior-ის, Valentino-ს, Chanel-ისა და Gucci-ს მიმართ, რადგან ზენდეიას კარიერის დასაწყისში მსახიობის ჩაცმაზე მათ უარი განაცხადეს". ამაზე კი არც ლა როუჩის პასუხმა დააყოვნა.

"ვფიქრობ, წვრილმანებზე გაბრაზებას თავისი მიზეზი აქვს, მაგრამ მე ეს ეტაპი უკვე გადავლახე. ბოღმის გულში ჩადება ადამიანს ამახინჯებს. რადგან მინდა, რომ უფრო ლამაზი ვიყო, ძველი წყენები დავივიწყე. სხვათა შორის, ახლა სწორედ Saint Laurent მაცვია", — დასძინა როუჩმა.

ფოტო: Getty

თუმცა, როცა ჰკითხეს, ჩაიცვამს თუ არა ზენდეიაც ამ დიზაინერების სამოსს, მან მოკლედ და მკაცრად უპასუხა: "არა". რადგან ზენდეია თინეიჯერობისას ამ დიდმა ბრენდებმა დაიწუნეს, როუჩის თქმით, მსახიობს მათ ტანსაცმელს აღარასოდეს ჩააცმევს.

ზენდეიას სტილი ფანებს ყოველთვის აღაფრთოვანებდა. ბოლო დროს კი, მსახიობმა და ლა როუჩმა ახალი წესი დანერგეს: ფილმების პრემიერებზე ზენდეია ტანსაცმელს პირდაპირ ფილმის შინაარსის მიხედვით ირჩევს. მაგალითად, Spider-Man: Brand New Day-ის პრემიერაზე ზენდეიას ობობას თემატიკის სამოსი ეცვა, ხოლო ფილმ The Odyssey-ის წარდგენისას ძველი ბერძენი ქალღმერთივით გამოიყურებოდა.