კრემლისტური პარტიის სოლიდარობა მშვიდობისთვის ლიდერი, პრორუსი მამუკა ფიფია აცხადებს, რომ მოსკოვიდან ძალიან მალე გაჟღერდება "გეორგიევსკი 2-თან" დაკავშირებული განცხადება. მან ისიც თქვა, რომ "ეთანხმება პრემიერ კობახიძეს, რომ 1783 წლის გეორგიევსკის ტრაქტატმა გადაარჩინა ჩვენი სახელმწიფოებრიობა და ქრისტიანობა, მაგრამ არ ეთანხმები იმაში, თითქოს ეს ნაბიჯი ევროპისკენ სავალ გზად გადაიდგა".

"როგორც "სოლიდარობა მშვიდობისთვის" ლიდერმა, მინდა ღიად განვაცხადო, ჩვენ ვმუშაობთ ამ მიმართულებით და ძალიან მალე მოსკოვიდან გაჟღერდება განცხადება "გეორგიევსკთან" დაკავშირებით.

დღეს დადგა დრო, ვიზრუნოთ ქვეყნის რეალურ გადარჩენაზე და ახალ "გეორგიევსკი 2-ზე". ამჯერად თანასწორუფლებიან პირობებში.

ვეთანხმები პრემიერ კობახიძეს, რომ 1783 წლის გეორგიევსკის ტრაქტატმა გადაარჩინა ჩვენი სახელმწიფოებრიობა და ქრისტიანობა, მაგრამ არ ვეთანხმები მას, თითქოს ეს ნაბიჯი ევროპისკენ სავალ გზად გადაიდგა," — განაცხადა მამუკა ფიფიამ "ტვ პირველთან" საუბრისას.

შეგახსენებთ, რომ დღეს გამართულ ბრიფინგზე ირაკლი კობახიძემ განაცხადა, რომ "საბოლოოდ, ერეკლე მეორის მიერ გადადგმული ნაბიჯი არათუ გამართლებული, არამედ ერთადერთი სწორი, უალტერნატივო გადაწყვეტილება აღმოჩნდა".