დიდ ბრიტანეტში რუსეთის ელჩმა ანდრეი კელინმა დიპლომატიური პოსტი, სადაც შვიდი წელი მუშაობდა, გასულ თვეში დატოვა. ინფორმაციას The Guardian ლონდონში რუსეთის საელჩოზე დაყრდნობით ავრცელებს.

გასულ კვირას, მას შემდეგ, რაც ცნობილი გახდა, რომ დიდი ბრიტანეთი კიევს დრონებს აწვდის, საელჩომ მოსალოდნელი "შედეგების" შესახებ გაფრთხილება გაავრცელა.

The Guardian-ის ცნობით, დიდ ბრიტანეთში რუსეთის "უფროსი დიპლომატიური პერსონალის" ონლაინ სიას ახლა მხოლოდ ვასილი ცინგანოვი ხელმძღვანელობს, რომელიც საელჩოს საქმეთა დროებითი რწმუნებულია.

საელჩოს პრესსპიკერმა განაცხადა, რომ კრემლმა კელინის დიპლომატიური მისია 21 ივლისს დაასრულა. "რაც შეეხება რუსეთ-დიდი ბრიტანეთის ურთიერთობების მდგომარეობას ყველა სფეროში, ის უპრეცედენტოდ დაბალ დონემდე დაეცა და ეს მთლიანად ლონდონის ინიციატივით მოხდა," — დასძინა მან.

პრესსპიკერმა Sunday Times-ს განუცხადა, რომ კელინი ცდილობდა დიდ ბრიტანეთთან კომუნიკაციის არხების შენარჩუნებას და მთავრობა რუსეთთან "კონფრონტაციის გზის" არჩევაში დაადანაშაულა.

"მან ბრიტანეთი იმ იმედით დატოვა, რომ უფრო კონსტრუქციული და პატივისცემაზე დამყარებული დიალოგი საბოლოოდ აღდგება, თუ დიდი ბრიტანეთი გადახედავს თავის პოლიტიკას ჩვენი ქვეყნის მიმართ," — განაცხადეს საელჩოში და დასძინეს, რომ კრემლს შემცვლელი კანდიდატურა ჯერ არ წარუდგენია.

მოგვიანებით საელჩომ გამოაქვეყნა განცხადება, სადაც აღნიშნული იყო, რომ კომენტარებში არაფერი მიუთითებდა რუსეთის განზრახვაზე, დაექვეითებინა დიპლომატიური ურთიერთობების დონე დიდ ბრიტანეთთან.

ბრიტანეთის საგარეო საქმეთა სამინისტროს პრესსპიკერმა განაცხადა: "ეს რუსეთის საგარეო საქმეთა სამინისტროს გადასაწყვეტი საკითხია. ჩვენ გვყავს ელჩი და საელჩო მოსკოვში, რათა ვიურთიერთოთ და წამოვჭრათ პრობლემური საკითხები რუსეთის მთავრობასთან. ჩვენ ვაგრძელებთ უკრაინის გვერდით დგომას, რომელსაც აქვს სრული უფლება დაიცვას თავი რუსეთის უკანონო აგრესიისგან",

The Guardian წერს, რომ კელინი ბოლო წლებში ბრიტანულ მედიასთან ინტერვიუებში რეგულარულად იმეორებდა კრემლის ნარატივებს. ივნისში Sky News-თან ინტერვიუში მან განაცხადა, რომ რუსეთი უკრაინაში ომს "ვერ წააგებს". იგი საბჭოთა დიპლომატიურ სამსახურს 1979 წელს შეუერთდა.

რუსეთმა დიდ ბრიტანეთთან რიტორიკა გასულ კვირას გაამწვავა მას შემდეგ, რაც თავდაცვის სამინისტროს წყაროებმა დაადასტურეს ცნობა იმის შესახებ, რომ უკრაინის სამხედროებმა რუსეთში არსებულ სამიზნეებზე დასარტყმელად ბრიტანული კომპანიების მიერ დამზადებული ორი დრონი გამოიყენეს.

რუსეთის საელჩომ Telegram-ზე გავრცელებულ განცხადებაში დასძინა: "ლონდონის ქმედებებს გარდაუვალად მოჰყვება შედეგები, რაზეც მას პასუხისგება მოუწევს".