ადვოკატის განცხადებით, 15 აგვისტოს ბათუმის ერთ-ერთ საცხოვრებელ სახლში გარდაცვლილი ტრანსგენდერი კაცის ოჯახი დაზარალებულად ცნობას და მუხლის გადაკვალიფიცირებას ითხოვს. საქმეზე გამოძიება თვითმკვლელობამდე მიყვანის მუხლით მიმდინარეობს. გარდაცვლილი რუსეთის მოქალაქე იყო.

ახალგაზრდა კაცის გარდაცვალების შესახებ ცნობები 22 აგვისტოს გამოჩნდა. დმიტრი მენიაევის ბინაში პოლიცია მას შემდეგ შევიდა, რაც მეზობლებმა მძაფრ სუნზე განაცხადეს. ოჯახმა დმიტრის გარდაცვალების შესახებ ცნობა მისი ცხედრის პოვნის შემდე ქართული მხარისგან მიიღო.

"15 აგვისტოს იპოვეს ცხედარი, ექსპერტიზა უკვე ჩატარებულია და ველოდებით რას დაადგენს გარდაცვალების მიზეზად. როგორც მეზობლები ამბობენ, ეს ბიჭი ძირითადად სულ სახლში იყო, დისტანციურად მუშაობდა და საკვებს და სხვა ნივთებსაც ძირითადად ონლაინ იძახებდა, გლოვოს და ვოლტის კურიერებს ხედავდნენ ხშირად მის ბინასთან.

კონკრეტულად რა ნივთები არ ჰქონდა გამოძიებას ამოღებული მისი ბინიდან, რაც ჩვენი ჩართვის მერე ამოიღეს, ვერ გეტყვით, რადგან ეს პირადი ნივთებია, თუმცა ოჯახი თვითმკვლელობის ვერსიაზე მეტად მკვლელობას ვარაუდობს", — უთხრა "რადიო თავისუფლებას" ოჯახის ადვოკატმა, ზვიად მარკოიძემ.

მისი თქმით, გარდაცვლილს ოჯახთან კარგი და თბილი ურთიერთობა ჰქონდა, თუმცა არც ძმას და არც დას საეჭვო გარემოებად არ მიუჩნევიათ მისი გაქრობა ონლაინაპლიკაციებიდან და არც პოლიციისთვის მიუმართავთ ძმის მოძებნის მოთხოვნით.

"დაკავებული არავინ არის, ფაქტზე მიმდინარეობს გამოძიება. ოჯახს პრეტენზია აქვს, მისი გარდაცვალება არ უკავშირდება თვითმკვლელობას, ოჯახი ვარაუდობს, რომ შესაძლოა მის გარდაცვალებასთან სხვა პირები იყვნენ კავშირში. ის ლგბტ თემის წარმომადგენელი იყო, ეს ადამიანი ისეთ გარემოში გარდაიცვალა, არავის დაუნახია, არ ავადმყოფობდა, პრობლემები არ ჰქონია. 21 წლის მამაკაცის გარდაცვალება ძალიან ბევრ კითხვებს ბადებს. თვითმკვლელობამდე მიყვანის მუხლით არის დაწყებული გამოძიება, ოჯახი დაზარალებულად ცნობას ითხოვს, მაგრამ უარყოფითი პასუხი მივიღეთ ჯერჯერობით, რაც მათ სამართლებრივ შესაძლებლობას ართმევს, რომ გაეცნონ საქმის მასალებს ახალგაზრდა მარტო ცხოვრობდა, რუსეთის მოქალაქეა, ებრაული წარმოშობის. 15 აგვისტოს გადაასვენეს ექსპერტიზაზე, საქართველოში დაკრძალავენ. 3 აგვისტოს ბოლოს "ტელეგრამზე" იყო კონტაქტზე", — აცხადებს ადვოკატი "ინტერპრესნიუსთან".

მისივე თქმით, ექსპერტი ამბობს, რომ გარდაცვლილს ძალადობის კვალი არ ჰქონდა, თუმცა საბოლოო დასკვნა ჯერ მზად არ არის.

"ექსპერტმა სავარაუდოდ, 12 დღის შემდეგ ნახა, პატარა ჭრილობების აღმოჩენა ჭირს, თუ დანა აქვს დარტყმული ან ნასროლი აქვს, ამას ექსპერტიზა აღმოაჩენდა. მუხლის გადაკვალიფიცირებას ითხოვენ, განყოფილების ნაცვლად პოლიციის დეპარტამენტმა გამოიძიოს. ექსპერტიზის საბოლოო დასკვნა ჯერ არ არის მზად", — ამბობს ადვოკატი ზვიად მარკოიძე.