განათლების, მეცნიერებისა და ახალგაზრდობის მინისტრმა, გივი მიქანაძემ განაცხადა, რომ იწყება მუშაობა იმ სახელმძღვანელოებისთვის, რომელიც რეპეტიტორიუმისთვის უნდა იყოს გამოყენებული. უახლოეს პერიოდში მოხდება პედაგოგების შერჩევა რეპეტიტორიუმისთვის.

"ინტენსიურად იწყება მუშაობა იმ სახელმძღვანელოებისთვის, რომელიც რეპეტიტორიუმისთვის უნდა იყოს გამოყენებული. ასევე, უახლოეს პერიოდში მოხდება პედაგოგების შერჩევა რეპეტიტორიუმისთვის, მათი გადამზადება და მათი მომზადება იმისთვის, რომ შემდეგი სასწავლო წლის დასაწყისში, უკვე რეპეტიტორიუმი ოფიციალურად ჩაეშვას.

რეპეტიტორიუმში ვერ იქნება 29-ბავშვიანი ჯგუფები, აქ იქნება ბევრად უფრო შემცირებული რაოდენობის ჯგუფები, მინიმუმ ნახევარი. თუმცა ვცდილობთ გამოვნახოთ შესაძლებლობა, რომ იქნებ 10-ბავშვიანი ჯგუფები გავაკეთოთ, იმისთვის, რომ ეს გადამზადება 3-4 საგანში, რომელიც მათ ეროვნულ გამოცდებზე უნდა ჩააბარონ, მაქსიმალურად ეფექტიანი იყოს. ის, რომ 3 ან 4 საგანში მოემზადებიან მთელი წლის განმავლობაში, იქნება ერთი - ერთში იმ მოთხოვნებსა და პროგრამასთან თანხვედრაში, რაც ეროვნული გამოცდების პროგრამითაა გათვალისწინებული და ბავშვების შემცირებული რაოდენობა იქნება, რა თქმა უნდა, ეს ყველაფერი თავის შედეგს გვაჩვენებს. მოუთმენლად ველით 2027-2028 სასწავლო წლის დაწყებას, როცა პირველად ჩაეშვება რეპეტიტორიუმი. ჩვენი მიზანია ბავშვმა ისე დაამთავროს სკოლა, რომ მას თავისუფლად შეეძლოს ეროვნული გამოცდების ბარიერის დაძლევა და შესაბამის უნივერსიტეტში ადგილის მოპოვება", — განაცხადა გივი მიქანაძემ.

2025 წლის 2 დეკემბერს, ზოგადი განათლების რეფორმის ეროვნული კონცეფციის წარდგენისას, გივი მიქანაძემ პირველად საჯაროდ განაცხადა, რომ მე-11 კლასში ე.წ. რეპეტიტორიუმი შემოვიდოდა. მისი თქმით, მოსწავლეები იქ მხოლოდ იმ საგნებს ისწავლიდნენ, რომელთა ჩაბარებასაც ეროვნული გამოცდებისთვის აპირებდნენ. მიზნად დაასახელა ისიც, რომ მოსწავლეებს აღარ დასჭირვებოდათ კერძო რეპეტიტორებთან მომზადება.

შეგახსენებთ, რომ 2025 წლის 2 დეკემბერს, ზოგადი განათლების რეფორმის ეროვნული კონცეფციის წარდგენისას, გივი მიქანაძემ პირველად საჯაროდ განაცხადა, რომ მე-11 კლასში ე.წ. რეპეტიტორიუმი შემოვიდოდა. მისი თქმით, მოსწავლეები იქ მხოლოდ იმ საგნებს ისწავლიდნენ, რომელთა ჩაბარებასაც ეროვნული გამოცდებისთვის აპირებდნენ. მიზნად დაასახელა ისიც, რომ მოსწავლეებს აღარ დასჭირვებოდათ კერძო რეპეტიტორებთან მომზადება.

"ჩვენ შემოგვაქვს მე-11 კლასში ე.წ. რეპეტიტორიუმი, როდესაც ბავშვებს ექნებათ შესაძლებლობა, ისწავლონ მხოლოდ იმ საგნებში, რაც უნდა ჩააბარონ ეროვნულ გამოცდებზე. ეს იქნება ინტენსიური ერთწლიანი სასწავლო პროგრამა, რომელიც საშუალებას მისცემს თითოეულ მოსწავლეს, რომ მაქსიმალურად ჩაერთოს და მას აღარ უნდა დასჭირდეს დამატებით სკოლის გარეთ სასწავლო პროცესებში ჩართვა, იმიტომ, რომ მთელი სასწავლო პროცესი ორიენტირებული იქნება სწორედ იმ საგნებსა და მასალაზე, რომელიც ეროვნული გამოცდების პროგრამასთან იქნება ყველაზე ახლოს", – განაცხადა გივი მიქანაძემ.