ილიაუნის რექტორი ნინო დობორჯგინიძე ერთიანი ეროვნული გამოდების შედეგებს ეხმაურება. მისი თქმით, განათლების "დეფორმამ ყველაზე დაუცველ ჯგუფები დააზარალა". სოციალურ ქსელში გამოქვეყნებული პოსტში დობორჯგინიძე წერს, რომ "ვისაც არ უნდა, კერძოში წავიდეს" – ძალიან უსამართლო პასუხია".

"ეს დეფორმა რომ ყველაზე დაუცველ ჯგუფებს დააზარალებდა, ამაზე არაერთმა დაწერა. აგერ შალვა ტაბატაძემაც გამოაქვეყნა სტატისტიკა.

კი, აბიტურიენტები ხედავდნენ რისკს, რომ სახელმწიფო უნივერსიტეტებში ხელოვნურად შემცირებული ადგილების გამო ვერ მოხვდებოდნენ, მაგრამ ნაწილმა მაინც ვერ აირჩია კერძო უნივერსიტეტი გადასახადის გამო.

ასეთი აბიტურიენტები, განსაკუთრებით რეგიონებიდან, იაფფასიანი სამუშაო ადგილების ხარჯზე ახერხებდნენ სწავლას სახელმწიფო უნივერსიტეტებში. რაც არ უნდა მოინდომო, "სპარში" მოლარეობით კერძო უნივერსიტეტში ვერ ისწავლი.

კარგად ვიცი, რასაც ვწერ, ძალიან რთულია სტუდენტისთვის სწავლა და სრული დატვირთვით მუშაობა — გამოცდილიც მაქვს. მაგრამ მათთვის, ვინც შედარებით ხელმოკლე ოჯახიდანაა, ზოგჯერ ერთადერთი საშუალებაა, თავი დააღწიო ძალიან უთანასწორო გარემოს. სახელმწიფო და განათლების პოლიტიკა სწორედ ამისთვის გვჭირდება, თანაბარი პირობები შეუქმნას ყველას, დაგეხმაროს, რომ თავი დააღწიო.

"ვისაც არ უნდა, კერძოში წავიდეს" – ძალიან უსამართლო პასუხია, ძალიან!", – წერს ილიაუნის რექტორი ნინო დობორჯგინიძე სოციალურ ქსელში.

ცნობისათვის, განათლების მეცნიერებათა დოქტორმა, შალვა ტაბატაძემ სოციალურ ქსელში პოსტი გამოაქვეყნა, სადაც ერთიანი ეროვნული გამოცდების შედეგების საჯაროდ ხელმისაწვდომი მონაცემები გააანალიზა.

მისი თქმით, "შრომის ბაზრის მოთხოვნიდან გამომდინარე" სახელმწიფო უნივერსიტეტებში შემცირებული ადგილები, როგორც მოსალოდნელი იყო, გადანაწილდა კერძო უნივერსიტეტებში. მაგალითად, სამართლის პროგრამებზე საჯარო უნივერსიტეტებში ჩაირიცხა 652 სტუდენტით ნაკლები 2026 წელს 2025 წელთან შედარებით, ხოლო კერძო უნივერსიტეტებში ჩაირიცხა 332-ით მეტი სტუდენტი. შალვა ტაბატაძე ასევე წერს, რომ საჯარო უნივერსიტეტებში კონკრეტულ მოთხოვნადი მიმართულებების შეზღუდვამ კერძო უნივერსიტეტებს მეტი შესაძლებლობა მისცათ სტუდენტების მოსაზიდად.

ამავე თემაზე: