"ვარშავის სამიტიდან წამოვალთ ისე, რომ მომავალში შევძლებთ ჩვენი ქვეყნის თავდაცვისუნარიანობის გაღრმავებას და განმტკიცებას" - განაცხადა გიორგი მარგველაშვილმა დღეს, თბილისში თავდაცვის ინსტიტუციური აღმშენებლობის სკოლა - DIB-ის გახსნაზე. ცერემონიას თავდაცვის მინისტრიც ესწრებოდა.

"ჩვენი ქვეყანა რეალურად ურთულესი გამოწვევების წინაშე დგას, მაგრამ ამავე დროს, უდიდესი შესაძლებლობებიც გვაქვს.

სულ უფრო მეტი ქვეყანა, როგორც ევროპაში, ასე აზიაში, ხედავს ჩვენი რეგიონის მნიშვნელობას. ხედავს იმას, რომ ჩვენ რეგიონში სტაბილური განვითარება მნიშვნელოვანი, მომგებიანი და ხელსაყრელია გლობალურად სტაბილური, ევროპული და აზიური გეოპოლიტიკური პროცესების განვითარებისათვის" - თქვა პრეზიდენტმა.

საქართველოს პრეზიდენტმა კიდევ ერთხელ აღნიშნა, რომ ქვეყნის სტაბილურობას ნატოში ინტეგრაციით ხედავს და რომ ამ მიმართულებით საქართველოს არაერთი მტკიცე ნაბიჯი აქვს გადადგმული.

"ეს წარმატება თავის მხრივ მიღწეული იყო არაერთი ქართველი სამხედრო მოსამსახურის გმირული შრომის, გმირული მოღვაწეობის და სისხლის შედეგადაც კი, რომელსაც ჩვენ ყოველთვის პატივს მივაგებთ".

პრეზიდენტის განცხადებით, ქართული სახელმწიფო გააგრძელებს თავის სვლას რეგიონის, ქვეყნის თავდაცვისუნარიანობის განმტკიცების თვალსაზრისით და ეს ნაბიჯი არანაირად არ არის მიმართული რომელიმე ქვეყნის საწინააღმდეგოდ:

"რეალურად თუ შევხედავთ, ყველა ჩვენი პარტნიორი და მეზობელი უნდა იყოს დაინტერესებული სტაბილური და ძლიერი ქვეყნის, სტაბილური და ძლიერი საქართველოს განმტკიცებისათვის“.

საქართველოს პრეზიდენტის პრესსპიკერის ეკა მიშველაძის თქმით, აღნიშნული სკოლის დაარსება მნიშვნელოვანია, როგორც საქართველოსთვის, ასევე პარტნიორი ქვეყნებისთვის და ის საქართველოს ნატოსთან ურთიერთობის კიდევ ერთი დამაკავშირებელი კომპონენტია.

"ეს სკოლა იქმნება იმისთვის, რომ მიღებული ცოდნა დავამუშავოთ, ჩამოვაყალიბოთ და შემდეგ გავუზიაროთ რეგიონში ჩვენს პარტნიორ ქვეყნებს".

თავდაცვის ინსტიტუციური აღმშენებლობის სკოლა თავდაცვის სამინისტროს პროფესიული განვითარების ცენტრის ბაზაზე დაფუძნდა.

სკოლა ითვალისწინებს პროფესიული განვითარების პროგრამებს როგორც თავდაცვისა და უსაფრთხოების სექტორის სამოქალაქო და მაღალი რანგის სამხედროებისთვის, ასევე აღნიშნულ სფეროში სამოქალაქო საზოგადოების წარმომადგენლებისთვის.