ნიდერლანდების საგარეო საქმეთა მინისტრი, ჰალბე ზეილსტრა მას შემდეგ გადადგა, რაც აღიარა, რომ რუსეთის პრეზიდენტ ვლადიმერ პუტინთან შეხვედრის შესახებ მოიტყუა.

გადადგომის შესახებ მან სამშაბათს, 13 თებერვალს განაცხადა, რამდენიმე საათით ადრე, ვიდრე მოსკოვში ოფიციალური ვიზიტით გაემგზავრებოდა. თავისი გადაწყვეტილება ზეილსტრამ პარლამენტის სხდომაზე გააჟღერა, სადაც დეპუტატებმა ახსნა-განმარტებისთვის მიიწვიეს, რა დროსაც ყოფილმა მინისტრმა ცრემლები ვერ შეიკავა.

2017 წლის წინასაარჩევნო კამპანიის დროს ზეილსტრა ამტკიცებდა, რომ 2006 წელს პირადად გაიგონა, პუტინი რეგიონულ ექსპანსიასა და "უფრო დიდი რუსეთის" შესახებ როგორ საუბრობდა. იმ დროს ზეილსტრა კომპანია Shell-ში კონტრაქტით მუშაობდა.

ორშაბათს მინისტრმა ინტერვიუს დროს აღიარა, რომ მოიტყუა და სინამდვილეში, როდესაც პუტინი ამ სიტყვებს ამბობდა, იქ არ იყო. ზეილსტრას განმარტებით, ამით მას თავისი წყაროს დაცვა სურდა - ადამიანის, რომელიც პუტინის გვერდით იყო, როდესაც ეს სიტყვები გააჟღერა.

პოლიტიკოსმა აღიარა, რომ თავის კარიერაში ყველაზე დიდი შეცდომა დაუშვა და თქვა, რომ ნიდერლანდები ისეთ საგარეო საქმეთა მინისტრს იმსახურებს, რომელიც სამშობლოში და მის ფარგლებს გარეთ ყველა ეჭვზე მაღლა იდგება. მიუხედავად აღიარებისა ზეილსტრა ამტკიცებს, რომ პუტინმა ეს სიტყვები მართლა თქვა.

ნიდერლანდებში რუსეთის საელჩომ განცხადა, რომ ზეილსტრას სიტყვები კრიტიკას ვერ უძლებს და მიმართულია იმისკენ, რომ მოსკოვის რეალური მიზნების შესახებ არასწორი წარმოადგენა შექმნას და გაავრცელოს.

ჰალბე ზეილსტრას ნიდერლანდების საგარეო საქმეთა მინისტრის პოსტი 2017 წლის ოქტომბრიდან ეკავა. ის ქვეყნის პრემიერ-მინისტრის, მარკ რიუტეს უახლოესი მოკავშირეა და შიდაპარტიული კოალიციის ჩამოყალიბებაში დაეხმარა.

ცნობილი გახდა ისიც, რომ პრემიერმა სიმართლე რამდენიმე კვირის წინ გაიგო, თუმცა პარლამენტს ამის შესახებ არ შეატყობინა. დეპუტატებმა რიუტეს მიმართ ნდობის საკითხი დააყენეს კენჭისყრაზე, თუმცა უნდობლობა არ გამოუცხადებიათ.