6 წლის ზაინაბ ანსარის გაუპატიურებასა და მკვლელობაში ბრალდებულ პაკისტანელ კაცს სასიკვდილო განაჩენი გამოუტანეს. პაკისტანის სასამართლომ გადაწყვეტილება 17 თებერვალს მიიღო. ინფორმაციას CNN ავრცელებს.

სასამართლო პროცესი 4 დღის განმავლობაში გრძელდებოდა. დნმ-ს შემოწმების შემდეგ, 24 წლის იმრან ალი სასამართლომ დამნაშავედ სცნო. მას ბრალი ედებოდა გატაცებაში, მკვლელობაში, გაუპატიურებასა და გარყვნილებაში.

6 წლის გოგოს მკვლელობამ პაკისტანში მოსახლეობის საპროტესტო აქციები გამოიწვია. საზოგადოება დანაშაულის ერთ-ერთ მიზეზად პოლიციის არაკომპეტენტურობას ასახელებდა. BBC-ის ცნობით, აქციისას 2 ადამიანი დაიღუპა.

პოლიციის განცხადებით, ზაინაბის მკვლელი სხვა ადგილობრივი გოგოების გაუპატიურებასა და მკვლელობაშიც იყო ბრალდებული. მის მიერ ჩადენილი დანაშაულებები დაახლოებით 1 წელს გრძელდებოდა. მოსახლეობა მიიჩნევდა, რომ სწრაფი და ეფექტიანი მუშაობის შემთხვევაში, პოლიცია მის გამოაშკარავებას უფრო ადრე შეძლებდა.

პაკისტანის ქალაქ კასურში ბოლო ორი წლის განმავლობაში უამრავი არასრულწლოვანი გოგო გაიტაცეს, გააუპატიურეს და მოკლეს. მშობლები ამბობდნენ, რომ შვილების სახლიდან გაშვების ეშინოდათ.

4 იანვარს, ზაინაბის მშობლები საუდის არაბეთში სალოცავად იყვნენ წასულები, თავად ზაინაბი კი გაკვეთილზე დასასწრებად მიდიოდა, როდესაც ის გაიტაცეს. მისმა ბიძამ გოგოს დაკარგვის შესახებ პოლიციაში მომდევნო დღეს განაცხადა.

გატაცებიდან 5 დღის შემდეგ, ზაინაბ ანსარის გვამი პოლიციამ კასურში, მის სახლთან ახლოს არსებულ ნაგავსაყრელზე აღმოაჩინა.

იმრან ალი ზაინაბის მეზობლად ცხოვრობდა. პოლიციამ ის 23 იანვარს დააკავა.

ზაინაბის ოჯახი

ზაინაბ ანსარის ოჯახი აცხადებდა, რომ პოლიციამ საკმარისი ძალისხმევა არ გაწია მის მოსაძებნად. გოგოს ნათესავებმა ფარული ვიდეოკამერების ჩანაწერები გამოიკვლის, რომელიც აჩვენებდა, რომ ზაინაბი უცნობ კაცთან ერთად მიდიოდა.

აუტოფსიის შედეგად გაირკვა, რომ 7 წლის გოგო გატაცებიდან რამდენიმე დღის შემდეგ მოკლეს.

"ალაჰმა ის უსაყვარლესი შექმნა. ვინც მას გაიცნობდა, მაშინვე უყვარდებოდა", - ამბობს ზაინაბის მამა, მუჰამედ ამინ ანსარი.

ოჯახის წევრების თქმით, მას ნაყინი და მანგო უყვარდა და სურდა, რომ მასწავლებელი ან ექიმი გამხდარიყო.

ზაინაბის უფროსი ძმის თქმით, მას შემდეგ, რაც თავისი დის დასახიჩრებული სხეული ნახა, ღამე ვეღარ იძინებს:

"ის ისეთი მხიარული იყო, მენატრება მისი სიცილი. ამას ვერ დავივიწყებ".