საქართველოს პრემიერ-მინისტრის, გიორგი კვირიკაშვილის თქმით, ნატოს შესახებ საქართველოს მოსახლეობის ინფორმირება უმნიშვნელოვანესია.

მისი თქმით, ნატოს შესახებ საინფორმაციო ცენტრი, საგარეო საქმეთა სამინისტროსა და სხვა უწყებებთან ერთად, მართავს არაერთ ღონისძიებას, რათა მოსახლეობის ინფორმირებულობის დონე გაიზარდოს.

"ჩვენმა მოქალაქეებმა ძალიან კარგად უნდა გაიგონ ის სარგებელი, რომელსაც ჩვენი ქვეყანა იღებს ნატოსთან ინტეგრირების პროცესით; თუ რამდენად მნიშვნელოვანია სტაბილურობა ჩვენი ქვეყნისთვის. სწორედ ამ თანამშრომლობას მოაქვს ის სტაბილურობა, რომელიც დღეს ჩვენ გვაქვს", - განაცხადა პრემიერ-მინისტრმა.

მისი თქმით, ნატოსთან თანამშრომლობა დღეს უმაღლეს ნიშნულზეა.

"უმნიშვნელოვანესია ის პროგრესი, რომელიც გვაქვს ძირითადი პაკეტის განხორციელების პროცესში, ასევე უმნიშვნელოვანესია პოლიტიკური მხარდაჭერა, რომელიც ნატოს წევრი ქვეყნებისა და გენერალური მდივნისგან საქართველოს აქვს", - ამბობს გიორგი კვირიკაშვილი.

პრემიერ-მინისტრი ფიქრობს, რომ ქვეყნის მოსახლეობის ჩართულობა და მათი ინფორმირებულობა უმნიშვნელოვანესია, რათა სწორი ინფორმაცია ჰქონდეთ იმ პროცესის შესახებ, რომელიც საქართველოშია.