რესპუბლიკური პარტია ადამიანის უფლებათა კომიტეტის თავმჯდომარის, სოფო კილაძის განცხადება რელიგიური შუღლის გაღვივების ხელშეწყობად აფასებს.

სოფიო კილაძის ინიციატივით, რელიგიური გრძნობების დაცვის მიზნით, პარლამენტში სამუშაო ჯგუფი შეიქმნება, რომელშიც სხვადასხვა კონფესიის წარმომადგენლები ჩაერთვებიან. მას მიაჩნია, რომ რელიგიური გრძნობების შეურაცხყოფა გახშირდა.

"ქართული ოცნების წარმომადგენლებს ავიწყდებათ, რომ სეკულარულ სახელმწიფოში ცხოვრობენ და გადაწყვეტილებების მიღებისას უნდა იხელმძღვანელონ, როგორც მოქალაქეებმა და არა, როგორც მრევლის წარმომადგენლებმა", - ნათქვამია რესპუბლიკური პარტიის განცხადებაში.

მათივე თქმით, ადამიანის უფლებათა კომიტეტის თავმჯდომარის, სოფო კილაძისა და განათლების კომიტეტის თავმჯდომარის, მარიამ ჯაშის, განცხადებები "საფრთხის შემცველია":

"ქვეყნის განვითარებისთვის ყველაზე მნიშვნელოვანი მიმართულებების ხელმძღვანელები - ადამიანის უფლებები და განათლება - ავლენენ ანტისახელმწიფოებრივ მიდგომას, რაც აბსოლუტურად არათავსებადია თანამედროვე ევროპული დემოკრატიული სახელმწიფოს იდეასთან".

პარტიის განმარტებით, სოფო კილაძის მიერ გაჟღერებული განცხადებები ავლენს, რომ საპატრიარქოსა და ხელისუფლებას შორის "პოლიტიკური კორუფცია" არსებობს.

"მოსალოდნელი არჩევნების წინ მსგავსი ინიციატივების ინტენსივობა და საპატრიარქოს მორიგი ჩარევა პოლიტიკურ პროცესში მიანიშნებს იმაზე, რომ როგორც, ქართული ოცნება ინარჩუნებს წინასაარჩევნოდ საპატრიარქოს იერარქების კეთილგანწყობას, ასევე, საპატრიარქო მზადაა აქტიურად ჩაერთოს პოლიტიკურ პროცესებში", - ნათქვამია პარტიის განცხადებაში.

რესპუბლიკური პარტია ქართული ოცნების პარტიის თავმდჯომარეს, გიორგი კვირიკაშვილის, გენერალურ მდივანს კახი კალაძესა და აღმასრულებელ მდივანს, ირაკლი კობახიძეს პროცესში ჩართვისკენ მოუწოდებენ.

დღეს, 24 აპრილს საქართველოს პარლამენტის ადამიანის უფლებების კომიტეტმა განიხილა პატრიოტთა ალიანსის წევრის, ემზარ კვიციანის საკანონმდებლო ინიციატივა სისხლის სამართლის კოდექსში ცვლილებების შეტანის თაობაზე.

ინიციატივის თანახმად, დასჯად ქმედებად ცხადდება რელიგიური სიწმინდეების, რელიგიური ორგანიზაციის, ღვთისმსახურის და მორწმუნის მიმართ სიძულვილის საჯაროდ გამოხატვა ან ისეთი მასალის გამოქვეყნება ან ჩვენება, რაც მიზნად ისახავს მორწმუნეთა გრძნობების შეურაცხყოფას. პასუხისმგებლობის სახით შემოთავაზებულია თავისუფლების აღვკეთ ერთ წლამდე ვადით.

გაიგეთ მეტი:

• ოცნების 5 დეპუტატი, რომელიც რელიგიური გრძნობების შეურაცხყოფის კანონით დარეგულირებას ეთანხმება