კანაფის, მწვადებისა და მუსიკის ფონზე ჩატარებული პარტიული ყრილობის შემდეგ, გირჩი პირველ პოლიტიკურ ჩეტბოტს გაუშვებს. პარტიაში ამბობენ, რომ ჩეტბოტის შექმნა ადამიანური რესურსის დაზოგვაში დაეხმარებათ. გარდა ამისა, ხელოვნური ინტელექტისა და თანამედროვე ტექნოლოგიების დახმარებით, საზოგადოებასთან კომუნიკაცია გაცილებით უფრო მარტივი და ეფექტური გახდება.

ჩეტბოტს გირჩის სოც.მედია მენეჯერის, მარიტა რატიანის პატივსაცემად მარიტა v2.0 ჰქვია. მას თავისი ფეისბუქგვერდი ექნება, რომელსაც "გირჩის ბოტი" ერქმევა. გირჩმა ჩეტბოტზე მუშაობა ათი დღის წინ დაიწყო. ყველა კითხვაზე პასუხი არ აქვს, თუმცა ის დღეს გაეშვება. კომუნიკაციის დროს, გირჩის ბოტი წინასწარ შეგროვებულ ინფორმაციას იყენებს და დასმულ კითხვებს კონტექსტის შესაბამისად სცემს პასუხებს.

მარიტა სოციალური მედია მენეჯერის ფუნქციებს ითავსებს და მასთან საუბარი ნებისმიერ დროს არის შესაძლებელი. ბოტი მზად არის უპასუხოს კითხვებს ისეთ თემებზე, როგორიცაა სავალდებულო სამხედრო სამსახური, ბიბლიური თავისუფლება, წინასაარჩევნო დაპირებებზე, დაგროვებით საპენსიო რეფორმაზე და სხვ. მარიტა, ცხადია, პასუხებს გირჩის პოზიციიდან სცემს და თანამოსაუბრეს პარტიის მოსაზრებებს აცნობს.

"მარიტა მოქალაქეებს დაეხმარება პარტიასთან კომუნიკაციაში, მყისიერად მიაწვდის მათ ინფორმაციას გირჩის საარჩევნო დაპირებების შესახებ. წვევამდელებს უზრუნველჰყოფს სათანადო ინფორმაციით იმის თაობაზე თუ რა პროცედურების გავლაა საჭირო რომ ისინი გახდნენ ბიბლიური თავისუფლების მღვდელმსახურები და სხვა", - ამბობს საპრეზიდენტო კანდიდატი ზურა ჯაფარიძე.

გარდა სერიოზული თემებისა, მარიტას სხვა ფუნქციების შესრულებაც შეუძლია. მაგალითისთვის, ბოტი გთავაზობთ სპეციალური ქვიზების შევსებას იმის დასადგენად, თუ რამდენად შეესაბამება თქვენი მოსაზრებები გირჩისას. ამასთან, მარიტა მზადაა ილია ჭავჭავაძეზეც ესაუბროს ნებისმიერ მსურველს. ბოტი თანამოსაუბრეს ილია ჭავჭავაძის პოზიციებს აცნობს სხვადასხვა თემებზე, როგორიცაა კერძო საკუთრების იდეა, პროტექციონიზმი, თავისუფალი ბაზარი და სხვ.

"ჩვენს ბოტს შეეძლება, რომ ადამიანებს ბევრ საკითხზე დამოუკიდებლად მიაწოდოს ამომწურავი ინფორმაცია. გარდა ამისა, ბოტი მოსაწყენი რომ არ ყოფილიყო, გასართობი ფუნქციებიც დავამატეთ. მას შეუძლია სერიოზულ თემებზე ადამიანს ქვიზების გაკეთება შესთავაზოს, მაგრამ ისე, რომ თან გაართოს და პროცესში არ დაღალოს", - ამბობს გირჩის წევრი და ჩეტბოტის ტუტორი ლევან ჯგერენაია.