საგამოცდო ცენტრებში დამონტაჟებულია კონდიციონერები, რომლის შესყიდვაზეც ნებართვა ჯერ არ არსებობს. საგანმანათლებლო და სამეცნიერო ინფრასტრუქტურის განვითარების სააგენტომ შესყიდვების სააგენტოს ნებართვის მისაღებად 29 ივნისს მიმართა, თუმცა პასუხი ჯერ არ მიუღია.

საქართველოს ახალგაზრდა იურისტთა ასოციაციაში აცხადებენ, რომ საფუძველი, რომლითაც უწყება კონდიციონერების ყიდვას აპირებს მის წინსწრებით შესყიდვას გამორიცხავს.

"შესყიდვის საფუძვლად მითითებულია ღონისძიების შეზღუდულ ვადებში შეუფერხებლად ჩატარება, გამარტივებული შესყიდვის კრიტერიუმებისა და გამარტივებული შესყიდვის ჩატარების წესის პუნქტების შესაბამისად, შემსყიდველ ორგანიზაციას არ აქვს უფლება სააგენტოს თანხმობამდე განახორციელოს შესყიდვა და გააფორმოს ხელშეკრულება", - განმარტა საიას პროექტების კოორდინატორმა, სალომე საგანელიძემ On.ge-სთან საუბრისას.

მისი თქმით, ერთადერთი გამონაკლისი ის შემთხვევაა, როცა შესყიდვის საფუძვლად მითითებულია: "შეთანხმება გადაუდებელი აუცილებლობით შესყიდვის შემდგომ". თუმცა ამ შემთხვევაში უწყებას შესყიდვების სააგენტოსთვის მსგავსი საფუძვლით არ მიუმართავს.

განათლების სამინისტროში ადასტურებენ, რომ კონდიციონერების ნაწილი საგამოცდო ცენტრებში უკვე დამონტაჟებულია. განათლების მინისტრის მოადგილე, თეიმურაზ მურღულია ამბობს, რომ პრობლემები არ შეექმნებათ, რადგან საკითხის მთავრობის სხდომაზე განხილვის დროსაც მისი გადაუდებელი საჭიროება გამოჩნდა.

"არსებობს გადაუდებელი საკითხის ორი ფორმა: გაკეთება და აღიარება და მოთხოვნის წარდგენა და შემდეგ დასტურის მიღება. ჩვენ სპეციფიკის გათვალისწინებით ორივე რეჟიმი გვაქვს - ნაწილი გვაქვს აღიარებაზე, ნაწილი შეთანხმებაზე. რადგან მთავრობის სხდომაზე იყო ეს საკითხი დაყენებული", - განუცხადა On.ge-ს განათლების მინისტრის მოადგილემ.

უწყება 21 საგამოცდო ცენტრისთვის 900 ცალი კონდიციონერისთვის 2 000 000 ლარის დახარჯვას გეგმავს.

ამ საკითხზე On.ge შესყიდვების სააგენტოდან ელოდება პასუხს.

ერთიანი ეროვნული გამოცდები დღეს, 2 ივლისს დაიწყო. განათლების სამინისტრის მოადგილის, თეიმურაზ მურღულიას განცხადებით, 5 ივლისს ჩათვლით გამოცდები დღის პირველ ნახევარში ჩატარდება. გრაფიკის ცვლილების მიზეზად მურღულიამ მოსალოდნელი მაღალი ტემპერატურა დაასახელა.

თავდაპირველი ინფორმაციით, კონდინციონერები მხოლოდ რუსთავში იქნებოდა, პრემიერის საყვედურის შემდეგ მურღულიამ განაცხადა, რომ ყველა საგამოცდო ცენტრში მობილური კონდიციონერების შეტანა იგეგმება.