პარტია ნაციონალური მოძრაობის დეპუტატი, რომან გოცირიძე საქართველოს მთავარი პროკურორის არჩევის წესს აკრიტიკებს. მისი განცხადებით, ხელისუფების მხრიდან იყო დაპირება, რომ ისინი მთავარი პროკურორის პოსტზე წარადგენდნენ პოლიტიკურად ნეიტრალურ კანდიდატურას, თუმცა პირიქით მოხდა.

"აღმოჩნდა, რომ ფაქტობრივად გრძელდება მავნე პრაქტიკა, მაღალი თანამდებობის პირების დანიშვნასთან დაკავშირებით. ჩემი პროგნოზი ახდება და ამ თანამდებობაზე ვიხილავთ რომელიმე ყოფილს. ყოფილები რას ნიშნავთ იცით. თანამდებობას ყოველთვის იკავებენ ადამიანები, რომლებიც ივანიშვილის სამსახურში იყვნენ: ყოფილი ექიმი, ყოფილი მცველი, ყოფილი ბანკირები და ახლა ამ კანდიდატურებში ვიხილეთ ყოფილი ადვოკატი", - განაცხადა რომან გოცირიძემ პარლამენტის პლენარულ სხდომაზე.

მისი თქმით, ეს ერთი მხრივ კომიკური და საშიში ტენდენციაა, რომელიც უნდა დასრულდეს.

"სად არის პოლიტიკურად ნეიტრალური კანდიდატი ამ სიაში? ათამდე ადამიანიდან 9 სიაში ანტურაჟის შესაქმნელადაა. სამწუხაროდ, საკმაოდ სერიოზული ადამიანები ამ სიაში მხოლოდ და მხოლოდ მოჩვენებით ფონს ქმნიან. განა მათ არ იციან, ვინ იქნება მთავარი პროკურორი? განა არ იციან, რომ პროკურორის შერჩევის დემოკრატიულობის ილუზიას ქმნიან?", - განაცხადა გოცირიძემ.

მისი თქმით, დღეს თანამდებობის პირებს ბიძინა ივანიშვილის პირადი ერთგულებითა და შავ-ბნელი საქმეების გაკეთების შესაძლებლობით ირჩევენ.

"ვისაც კვირიკაშვილთან სუფრაზე ჭიქა აუწევია ყველა შავ სიაში შეიყვანეთ ეს სია გაგრძელდება და ვის მოუწევს თანამდებობის დატოვება მალე ვნახავთ", - განაცხადა რომან გოცირიძემ.

მთავარი პროკურორის კანდიდატურაზე განაცხადების მიღება საპროკურორო საბჭოს გვერდზე 4 ივლისს სრულდება.

დღეისათვის მთავარი პროკურორის პოსტზე 20 კანდიდატურაა წარდგენილი:

1. პაატა შავაძე;
2. ზურაბ ჯორბენაძე;
3. გია ბერძენიძე;
4. ნანა რევაზიშვილი;
5. თამარ კერესელიძე;
6. გრიგოლ გაგნიძე;
7. იოსებ ბაჩიაშვილი;
8. მაია ცაცანაშვილი;
9. ჯემალ გახოკიძე;
10. გიორგი შაშიაშვილი;
11. ნინო გოგნიაშვილი;
12. ედიშერ ფუტკარაძე;
13. შალვა თადუმაძე;
14. ირაკლი ნადარეიშვილი;
15. შალვა შავგულიძე;
16. ნონა ფილაური;
17. ალექსანდრე კობაიძე;
18. ლენა კაპანაძე;
19. კოტე ჭილაია;
20. ლევან ძნელაძე.

კიდევ ერთმა კანდიდატმა, მთავარი პროკურორის მოქმედმა მოადგილე გიორგი გოგაძემ, თავისი კანდიდატურა 22 ივნისს მოხსნა.