თურქეთის პრეზიდენტმა, რეჯეპ ტაიპ ერდოღანმა განაცხადა, რომ ყველა ბიზნესს, რომლის წარმომადგენლებიც ფეტულა გიულენთან არიან კავშირში, შემოსავლების გარეშე დატოვებს და კიდევ ერთხელ განმარტა, რომ გიულენის სკოლები, ორგანიზაციები და საქველმოქმედო დაწესებულებები "ტერორიზმის ბუდეა". ინფორმაციას Reuters ავრცელებს.

ერდოღანის განმარტებით, სწორედ ბიზნესია ის ქსელი, რომელშიც გიულენს ძლიერი გავლენა აქვს. ერდოღანი ამბობს, რომ გიულენი თავისი სკოლებისა და ორგანიზაციების მეშვეობით უკვე წლებია ცდილობს ე.წ. პარალელური სტრუქტურით მოქმედებას იმისთვის, რომ სახელმწიფო გადატრიალება მოახდინოს. მისი თქმით, სახელმწიფოს ქმედებები აღნიშნულ საკითხთან მიმართებაში საკმაოდ ხისტი იქნება.

გარდა ამისა, ერდოღანმა სინანული გამოთქვა იმის გამო, რომ წარსულში ფეტულა გიულენის ორგანიზაციას ეხმარებოდა, ვერ ხედავდა მის რეალურ ზრახვებსა და 2010 წლამდე ვერ შეძლო ორგანიზაციის რეალური სახე ეჩვენებინა თურქი ხალხისთვის:

"ამ მომენტიდან ეჭვების ეპოქა დასრულდა და ბრძოლის ეპოქა დაიწყო. მიუხედავად ყველაფრისა, ვნანობ რომ ვერ გამოვავლინე მისი რეალური სახე. ვიცი, რომ ჩვენ ანგარიშვალდებულები ვართ ერისა და ხალხის წინაშე. ჩვენო ღმერთო და ჩვენო ხალხო, გვაპატიეთ".

მან განმარტა, რომ მიუხედავად რიგი უთანხმოებისა, წარსულში ის და გიულენი თანამშრომლობდნენ და განაცხადა, რომ მათი უთანხმოების ერთ-ერთი მიზეზი მათი განსხვავებული რელიგიური შეხედულებები იყო:

"ამ ორგანიზაციის ლიდერის მიმართ მისი განათლებასთან, ხალხის დახმარებასა და სოლიდარობასთან დამოკიდებულების გამო მოთმინებას გამოვხატავდი. ჩვენ ტოლერანტობას ვიჩენდით, რადგან ისინი ამბობდნენ: "ღმერთო", ჩვენ კი ვამბობდით, რომ ერთი ფუძე გვქონდა".

მან ასევე 2013 წელიც გაიხსენა, როდესაც მის წინააღმდეგ გამოძიება თაღლითობისა და კორუფციის გამო დაიწყო და აღნიშნა, რომ სწორედ ამ დროს გამოჩნდა ფეტულა გიულენის ნამდვილი სახეც. მისი თქმით, არიან ადამიანები, რომლებსაც ახლაც კი არ სურთ გიულენის ბრალეულობის დანახვა.

თურქეთში მომხდარი სახელმწიფო გადატრიალების მცდელობის შემდეგ, ქვეყნის ხელისუფლების გადაწყვეტილებით, ერთ-ერთი ბანკი უკვე დახურეს. გარდა ამისა, დაიხურა სხვადასხვა მედია საშუალებები, თანამდებობიდან გაუშვეს ან დააპატიმრეს ათი ათასობით სახელმწიფო მოხელე.

მომხდარის შემდეგ თურქეთის პრეზიდენტმა, რეჯეპ ტაიპ ერდოღანმა ე.წ. წმენდა გამოაცხადა და განმარტა, რომ შესაძლოა ქვეყანაში სიკვდილით დასჯის აღდგენა განიხილონ, რასაც დასავლეთიდან არაერთგვაროვანი გამოხმაურებები მოჰყვა.

უფრო მეტი იხილეთ აქ: