სიცოცხლის ბოლომდე პრეზიდენტის პერსონალური დაცვით უზრუნველყოფა სახელმწიფო დაცვის სპეციალური სამსახურის ვალდებულება აღარ იქნება. შესაბამისი კანონპროექტი საქართველოს პარლამენტში, საპროცედურო საკითხთა კომიტეტის სხდომაზე განიხილეს. ამავე პროექტით, პერსონალური სახელმწიფო დაცვით სარგებლობის უფლება ყოფილ პარლამენტის თავმჯდომარეებსაც შეეზღუდება.

სახელმწიფო დაცვის სპეციალური სამსახურის შესახებ კანონპროექტის მომხსენებლები სახელმწიფო დაცვის სპეციალური სამსახურის უფროსი, ანზორ ჩუბინიძე და სახელმწიფო დაცვის სპეციალური სამსახურის იურისტი, ზაურ შავდათუაშვილი იყვნენ.

კანონპროექტის მიხედვით, უქმდება სახელმწიფო დაცვის სპეციალური სამსახურის შესახებ კანონში არსებული ჩანაწერი, რომლის მიხედვითაც, საქართველოს პრეზიდენტს თანამდებობაზე არჩევის დღიდან სიცოცხლის ბოლომდე ენიშნება პერსონალური დაცვა სამუშაო ადგილას, მუდმივ და დროებით ადგილსამყოფელში.

ცვლილებების მიხედვით, პრეზიდენტს, პრემიერ-მინისტრსა და პარლამენტის თავმჯდომარეს პერსონალური დაცვა სავალდებულო წესით უფლებამოსილების ვადის გასვლის ან უფლებამოსილების შეწყვეტის შემდეგ, ერთი წლის ვადით შეუნარჩუნდებათ.

მოქმედ კანონში წერია, რომ პრეზიდენტის უფლებამოსილების პერიოდში მისი ოჯახის წევრებს ენიშნებათ პერსონალური დაცვა და იგი უნარჩუნდებათ პრეზიდენტის უფლებამოსილების ვადის გასვლის შემდეგაც, პრეზიდენტის სიცოცხლის ბოლომდე. მოქმედი რეგლამენტით, ყოფილი პარლამენტის თავმჯდომარე უზრუნველყოფილია სახელმწიფო დაცვით ახალი მოწვევის პარლამენტის უფლებამოსილების ამოქმედებამდე.

მთავრობა დამოუკიდებლად დაადგენს, რა შემთხვევაში შეიძლება გაუგრძელდეთ მათ პერსონალური დაცვა ერთი წლის გასვლის შემდეგ. პრემიერ-მინისტრს, პრეზიდენტსა და პარლამენტის თავმჯდომარეს თანამდებობრივი უფლებამოსილების ვადის გასვლიდან ან უფლებამოსილების შეწყვეტიდან ერთი წლის გასვლის შემდეგ, ასევე მათივე ოჯახის წევრებს, სამსახურის სხვა დასაცავ პირებსა და მათი ოჯახის წევრებს დაცვა შეიძლება დაენიშნოთ თუკი მათ სიცოცხლესა და ჯანმრთელობას საფრთხე ემუქრება.

მთავრობის მიერ დაცვის გაგრძელების გადაწყვეტილებას საკომიტეტო განხილვაზე ევროპული საქართველოს დეპუტატის, ხათუნა გოგორიშვილის კითხვა მოჰყვა. დეპუტატის აზრით, მთავრობამ შესაძლოა ეს უფლებამოსილება გამოიყენოს და კონკრეტული პირისთვის დაცვის შეწყვეტის გადაწყვეტილება პოლიტიკური და პერსონალური დამოკიდებულებით მიიღოს.

კანონპროექტის ავტორმა, სახელმწიფო დაცვის სპეციალური სამსახურის უფროსმა, ანზორ ჩუბინიძემ განაცხადა, რომ მთავრობისთვის გადაწყვეტილების მიღება პრესტიჟის საკითხი იქნება.

"მთავრობა არ იქნება მომხრე სპეციალურად მოუხსნას დაცვა. შეურაცხყოფის საკითხია", - განმარტა ანზორ ჩუბინიძემ.

ასევე ხათუნა გოგორიშვილი დაინტერესდა კანონის ამოქმედების შემდეგ, ახალი რეგულაციები გავრცელდება თუ არა იმ პოლიტიკოსებზე, რომლებმაც უკვე დატოვეს თანამდებობები, მათ შორისაა ბიძინა ივანიშვილი და ირაკლი ღარიბაშვილი.

ანზრო ჩუბინიძის განცხადებით, ყველა პოლიტიკოსსა და მათ ოჯახის წევრებს, რომლებსაც უფლებამოსილების ვადა შეუწყდათ და სახელმწიფო დაცვა იცავს, ახალი ნორმის ამოქმედების შემდეგ დაცვის უფლება შეუწყდებათ. ამის შემდეგ, მთავრობა ინდივიდუალურად, ყველა პირზე მიიღებს გადაწყვეტილებას სახელმწიფო დაცვის გაგრძელების შესახებ.

"ბიძინა ივანიშვილი გადადგა თუ არა თავისი პოსტიდან, მაშინვე შეუწყდა დაცვა და ახლა დაქირავებული ყავს, არავითარ კავშირში არ არის სახელმწიფო დაცვასთან. ირაკლი ღარიბაშვილის შემთხვევაში, მას შეუწყდება სახელმწიფო დაცვა. ეს ეხება ყოფილ პრეზიდენტებსაც, მის ოჯახის წევრებსაც, თუ ამის საფუძველი მთავრობის სხდომის მიღებული გადაწყვეტილება გახდა. თუ არსებობს მუქარა, ეს საკითხი უნდა გახდეს განხილვის თემა და მთავრობამ შესაბამისი გადაწყვეტილება მიიღოს", - განმარტა ანზორ ჩუბინიძემ.

კანონპროექტის მიხედვით, უმაღლესი სახელმწიფო თანამდებობის პირებს სახელმწიფო დაცვა არ შეუნარჩუნდებათ, თუკი უფლებამოსილება კონსტიტუციის დარღვევის ან დანაშაულის ჩადენის გამო ჩამოართვეს. სახელმწიფო დაცვის სპეციალური სამსახურის მიერ მომზადებული კანონპროექტი პარლამენტს მთავრობამ წარუდგინა.