"ჩვენ გვსურს კიდევ უფრო მეტი NATO საქართველოში და მეტი საქართველო NATO-ში მომდევნო წელს", — ამის შესახებ კავკასიასა და ცენტრალურ აზიაში ნატო-ს გენერალური მდივნის სპეციალურმა წარმომადგენელმა ჯეიმს აპატურაიმ საქართველოს პრემიერ-მინისტრ მამუკა ბახტაძესთან შეხვედრის შემდეგ განაცხადა.

აპატურაის განცხადებით, ბახტაძესთან შეხვედრისას ისაუბრეს მდგრადი რეფორმების კურსსა და საქართველოს მდგრად წინსვლაზე ჩრდილოატლანტიკური ალიანსისკენ.

მისივე თქმით, პრემიერ-მინისტრმა აღნიშნა, რომ მთავრობის მტკიცე განზრახვაა ქართველი ხალხის ნების აღსრულება, რაც ქვეყნის ევროატლანტიკურ მომავალს გულისხმობს.

"მე, რა თქმა უნდა, აღვნიშნე ჩვენს მიერ ნაკისრი მტკიცე ვალდებულება, რომ ყველა ამ მიზნის მიღწევაში სრული მხარდაჭერა უზრუნველვყოთ. განვიხილეთ ამის კონკრეტული გზები და შევეხეთ შავი ზღვის აუზში მეტ უსაფრთხოებას, საქართველოში რეფორმების განხორციელების მიმართულებით მეტი მხარდაჭერის უზრუნველყოფას - რაც უკვე ხორციელდება" — განაცხადა აპატურაიმ.

მისი თქმით, შეხვედრის დროს პრაქტიკულ საოპერაციო საკითხებსაც დაუთმეს ყურადღება, თუ რა შეიძლება გაკეთდეს ერთობლივი ძალისხმევით.

"მომდევნო წელს მეტ NATO-ს იხილავთ საქართველოში; გვექნება ბევრი მაღალი დონის ვიზიტი ქვეყანაში და ამით ქართველი ხალხი დაინახავს, რომ ძალისხმევა ქმედითია. NATO-ს გააზრებულად აქვს ნაკისრი ვალდებულება საქართველოს მიმართ", — განაცხადა აპატურაიმ.

მან პრემიერ-მინისტრთან არჩევნების შედეგებზეც ისაუბრა და გამოთქვა გარკვეული წუხილი პოლიტიკური დიალოგის პოლარიზაციის თაობაზე.

"პრემიერ-მინისტრი ამას აცნობიერებს და აცხადებს, რომ ქართველ ხალხს სურს მშვიდი და ნაკლებად პოლარიზებული დისკუსია სამომავლოდ. ნატო-ში ჩვენ გვსურს ინკლუზიური პოლიტიკური პროცესი. პრემიერ-მინისტრი აცხადებს, რომ ქართველ ხალხსაც ეს სურს. ამდენად, ძალიან დამაიმედა მისმა სიტყვებმა. ჩვენ ორივეს გვსურს კიდევ უფრო მეტი ნატო საქართველოში და მეტი საქართველო ნატო-ში მომდევნო წელს", — განაცხადა ჯეიმს აპატურაიმ.

საქართველოს პრემიერ-მინისტრისა და კავკასიასა და ცენტრალურ აზიაში NATO-ს გენერალური მდივნის სპეციალური წარმომადგენლის შეხვედრა მთავრობის ადმინისტრაციაში გაიმართა.

თბილისს ნატო-ს გენერალური მდივნის სპეციალური წარმომადგენელი კავკასიასა და ცენტრალურ აზიაში, ჯეიმს აპატურაი 12 დეკემბერს ეწვია. საგარეო უწყების შეფასებით, კავკასიასა და ცენტრალურ აზიაში ნატო-ს გენერალური მდივნის სპეციალური წარმომადგენლის თბილისში ვიზიტი ადასტურებს ნატო-საქართველოს ურთიერთობებს მაღალ ინტენსივობას.