ადგილობრივი დროით შუაღამის 03:00 საათზე ბრიუსელის კრიმინალურ ლაბორატორიასთან ძლიერი აფეთქება მოხდა. არსებული ინფორმაციით, თავდამსხმელებმა, რომელთა რაოდენობა, სავარაუდოდ, ერთზე მეტი იყო, ბომბი შენობასთან ახლოს ააფეთქეს, რის შემდეგაც გაჩნდა ხანძარი, თუმცა არავინ არ დაშავებულა. ინფორმაციას საერთაშორისო მედია ბელგიურ ტელეკომპანია RTL-ზე დაყრდნობით ავრცელებს.

მიუხედავად იმისა, რომ ლაბორატორია მნიშვნელოვნად დაზიანდა, დაშავებულები არ არიან, რადგან იმ დროს შენობა ცარიელი იყო. აღნიშნული დაწესებულება ბრიუსელის ჩრდილოეთით მდებარეობს. სწორედ ამ ლაბორატორიაში ტარდება ექსპერტიზა სხვადასხვა კრიმინალურ საქმეზე.

ბელგიაში ტერორიზმის გამო უსაფრთხოების ზომები მიმდინარე წლის მარტიდანაა გამკაცრებული. მარტში ტერორისტთა თავდასხმას ბრიუსელის მეტროსა და აეროპორტში 32 ადამიანი ემსხვერპლა, ათეულობით კი დაშავდა.