დღეს, ზუგდიდში რეგიონულ მედიასთან შეხვედრისას ბიძინა ივანიშვილმა მისი პოლიტიკიდან წასვლის საკითხზე ისაუბრა. ექსპრემიერმა აღნიშნა, რომ მისი პოლიტიკიდან წასვლა ხშირად ქვეყნიდან წასვლასთანაა გაიგივებული, რაც არასწორია. როგორც თავად ამბობს, ის წავიდა პოლიტიკიდან, მაგრამ რჩება ქვეყნის მოქალაქედ და აპირებს აქტიურად ჩაერთოს მიმდინარე პროცესებში:

"ძალიან ოცნებობენ, რასაც ეძახიან წასვლას, ისეთი წასვლა არ შედგება. პოლიტიკიდან მე წავედი გახსნილად, გამოვაცხადე როგორც წავედი და დღესაც შემიძლია გავიმეორო თუ რამე კითხვები დარჩა. მე ვარ მოქალაქე, ჩვენი ქვეყნის მოქალაქე და არ ვაპირებ ქვეყნიდან წასვლას. ამასთან აიგივებენ ჩემს წასვლას, ამის ძალიან დიდი სურვილი აქვთ ოპონენტებს, რომ როგორმე ქვეყნიდან წავიდე და დავაცადო, ის ძველი ტაშფანდურა ისევ დააბრუნონ და ამასაც ძალიან ხშირად აიგივებენ."

ბიძინა ივანიშვილმა აღნიშნა, რომ კითხვები, რომელიც მისი წასვლის შემდეგ გაჩნდა, უსაფუძვლო იყო ვინაიდან მან პოლიტიკა ღირსეულად დატოვა:

"წავედი ჩემი აზრით, ღირსეულად მიუხედავად იმ კითხვებისა, რომელსაც აბსოლუტურად უსაფუძვლოდ ბევრი პოლიტიკოსი სვამს და ისე ღირსეულად წავედი, რომ შეიძლება მსოფლიო ისტორიაში ვერ ნახონ."

ექსპრემიერმა ასევე ისაუბრა პოლიტიკაში მოსვლის მიზეზებზეც. მისი განცხადებით, არჩევნებში მონაწილეობა მოქალაქეობრივი პასუხისმგებლობის გამო მიიღო და პოლიტიკიდან იმიტომ წავიდა, რომ თანამდებობაზე ყოფნის ამბიციები არ ამოძრავებდა:

"დასჭირდა ჩემს ქვეყანას მოვედი თავი გავწირე. გადავდე, გადავალაგე, გავუშვი ის მოძალადე ხელისუფლება და გავყევი, წავედი პოლიტიკიდან, ამით ვაჩვენე, რომ ეს არ იყო ჩემი პირადი ამბიცია, რომ არ მინდოდა რაღაც თანამდებობა მიმეღო. ნორმალურია, როცა სხვას აქვს ამბიციები და უნდა მარტო ქვეყანა. მათზე არავითარ კრიტიკას არ ვაპირებ, უბრალოდ მე ვარ ესეთი. მე არ მქონდა და არ არის ეს ჩემი მოწოდება, რომ დამჭირდა მოვედი".

ივანიშვილმა აღნიშნა, რომ მისი წასვლის მოლოდინი ცრუ იმედია და ის ქვეყნის სამსახურში დარჩება და მიიღებს მონაწილეობას წინასაარჩევნო პროცესებში. მისი განცხადებით, მას აქვს გარკვეული ავტორიტეტი საზოგადოებაში და ის იქნება აქტიური იმისთვის, რომ განხილვის და ანალიზის საფუძველზე მოქალაქეებმა სწორი გადაწყვეტილების მიღება შეძლონ.

"მე ვარ დღეს მოქალაქე , ყველა მოქალაქეს ვალდებულება აქვს, რომ მიიღოს მინიმალური მონაწილეობა პოლიტიკაში. ვის რამდენი შეუძლია იმდენი მონაწილეობა უნდა მიიღოს თავისი ქვეყნის განვითარებაში. უნდა მოვიდეს არჩევნებზე, ეს არის მინიმალური ვალდებულება მე ასე ვიტყოდი და ვალდებულების განცდა ყველა მოქალაქეს უნდა ჰქონდეს. იმის მიხედვით, რომ ბოლო კვლევები აჩვენებს ძალიან ბევრი არ აპირებს მოსვლას და ბევრი ფიქრის პროცესშია. ნურავის მიანდობთ თქვენს საკუთარ ბედს. გთხოვთ თითოეულ თქვენგანს, კარგად დააკვირდით პროცესებს, ჩაერთეთ ანალიზში და მოდით არჩევნებზე, რამეთუ თქვენ თქვენი ქვეყნის და შვილების მომავალს განსაზღვრავთ და განკარგავთ"

შეხვედრები რეგიონულ მედიასთან, - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერ-მინისტრი ბიძინა ივანიშვილი მონაწილეობს.

გადაცემას 2030-ის ჟურნალისტები ნათია თოიძე და მიხეილ ფეიქრიშვილი უძღვებიან. პროექტის პირველი გადაცემა 1 სექტემბერს, 12:00 საათზე აჭარიდან გავიდა GDS-ის პირდაპირ ეთერში.