ბიზნესმენ მამუკა ხაზარაძის ადვოკატი, ზვიად კორძაძე პროკურატურის ბრიფინგს ეხმაურება და ამბობს, რომ თიბისი ბანკის მსგავს საქმეებში იდენტიფიცირებული წერილების მოლოდინი არ უნდა იყოს.

"ასეთი ტიპის საქმეებში, რა თქმა უნდა, თუ კი მოლოდინი გვაქვს, რომ ვიღაცა დაბეჭდილ იდენტიფიცირებულ წერილს გააგზავნის, ცოტა სასაცილოა. გამოძიებამ უნდა შეამოწმოს ყველა გარემოება და ამის საფუძველზე დაასკვნას. მე მეგონა, რომ ერთი კვირა მაინც გაგრძელდებოდა გამოძიება", — აღნიშნა ადვოკატმა გადაცემა საქმის კურსში.

მისივე თქმით, წერილის ორიგინალი ლონდონში ექსპერტიზა გარკვეული პერიოდის წინ გაიგზავნა, თუმცა კონკრეტულ თარიღს არ ასახელებს. გარდა ამისა, კორძაძე ვერ ამბობს ექსპერტიზას რა დრო დასჭირდება.

დღეს, 6 მარტს გამართულ ბრიფინგზე პროკურატურამ განაცხადა, რომ მამუკა ხაზარაძის მიერ გახარიას მიმართ ბრალდებაზე ინფორმაციას ამ ეტაპზე ვერ გადაამოწმებენ, რადგან ბიზნესმენის წარდგენილი დოკუმენტი კომპიუტერში დაბეჭდილი ტექსტია და ავთენტიკურობის დადგენა შეუძლებელია. გარდა ამისა საქმის პროკურორმა, არჩილ ტყეშელაშვილმა აღნიშნა, რომ მამუკა ხაზარაძე არ ასახელებს შუამავალს, ვინც მას წერილი მიაწოდა.

ხაზარაძის ადვოკატმა ტვ პირველის ეთერში კიდევ ერთხელ თქვა, რომ მამუკა ხაზარაძე შუამავალს არ დაასახელებს:

"ვინც იქნა დასახელებული ის გამოიკითხა? რატომ უნდა ჰქონდეს მამუკას მოლოდინი, რომ შუამავლის დასახელების შემთხვევაში სწორად წავა რამე", — აღნიშნა ადვოკატმა და დაამატა, რომ შუამავალი ადამიანი არც გიორგი გახარიას ახლობელია და არც შინაგან საქმეთა სამინისტროში მუშაობს. მისივე თქმით, შუამავალი წავიდა გახარიასთან შესახვედრად და იმავე დღეს წერილით დაბრუნდა.

"გახარიას წერილი"

4 მარტს პარლამენტში მამუკა ხაზარაძემ განაცხადა, რომ არჩევნების წინ შინაგან საქმეთა მინისტრის, გიორგი გახარიასგან მუქარის წერილი მიიღო, რომლის მიხედვითაც, მოთხოვნების შეუსრულებლობის შემთხვეევაში დაუნგრევდნენ რეპუტაციას ქვეყანაში და საერთაშორისო ასპარეზზე.

ბიზნესმენმა აღნიშნა, რომ ამასთან დაკავშირებით პროკურატურა ინფორმირებული იყო. მისი თქმით, გამოძების ნაცვლად, პასუხად მიიღო ბრიფინგი და ბრალდება ფულის გათეთრების საქმეზე. თუმცა, პროკურატურაში ხაზარაძის ბრალდება უარყვეს და განაცხადეს, რომ დაკითხვისას ბიზნესმენმა მუქარა მხოლოდ ეროვნულ ბანკთან მიმართებაში გამოიყენა. უწყებაში განმარტავენ, რომ საუბარია ეროვნული ბანკის ოფიციალურ წერილზე, რომელშიც მამუკა ხაზარაძისა და ბადრი ჯაფარიძის გადადგომის მოთხოვნაზე იყო საუბარი.

თავად შინაგან საქმეთა მინისტრმა ბრალდებები უარყო და განაცხადა, რომ ეს არის "პრივილეგირებული ბიზნესმენის მცდელობა, პარლამენტიდან ჭორაობით იმუნიტეტი მოიპოვოს".

ამავე თემაზე:

• რა წერია ხაზარაძის მიერ პროკურატურაში მტკიცებულებად წარდგენილ დოკუმენტში