ქართული ოცნების ყოფილი დეპუტატი, ეკა ბესელია ფიქრობს, რომ თიბისი ბანკის საქმეზე საგამოძიებო კომისია უნდა შეიქმნას. მისი თქმით, პარლამენტმა უნდა აიღოს ხელში ზედამხედველის ფუნქცია და შევიდეს სიღრმეებში. თიბისი ბანკის საქმეზე საგამოძიებო კომისიის შექმნა პარლამენტში ევროპულმა საქართველომ მოითხოვა. ეკა ბესელიას თქმით, ეს კომისია შეიძლება არა საგამოძიებო, არამედ დროებითი იყოს, თუმცა რაიმე ტიპის განსახილველი ფორმატი აუცილებელად უნდა შეიქმნას.

დეპუტატს მიაჩნია, რომ თიბისი ბანკის საქმე სახუმარო თემა არ არის და კოლეგებს შეფასებებში სიფრთხილისკენ მოუწოდებს.

"ერთმა ფარატინა ფურცელმა შეიძლება ყველაფერი ამოაყირავოს ამ ქვეყანაში. გააჩნია, ფურცელს რა ისტორია აქვს. მე არ ვამტკიცებ არც ერთს და არც მეორეს. მე არ ვამბობს, რომ ის არის უტყუარი ან ფარატინა, თუმცა სასაცილო ნამდვილად არ არის. არც სახუმარო არ არის. ამას ცოტა მეტი სერიოზულობა სჭირდება. მნიშვნელობა აქვს, ვინ ლაპარაკობს, რა ვითარებაში, მთლიან სურათს უნდა შეხედო და არამგონია საქირქილო იყოს, ამას უნდა გარკვევა. ცოტა ფრთხილად მოვეკიდებოდი ამ საკითხს. ერთია, რომ გამოძიებამ მეტი სერიოზულობა უნდა აჩვენოს და არ უნდა იყოს მხარე", — განაცხადა ეკა ბესელია ტელეკომპანია პირველის ეთერში.

მისივე თქმით, წერილმა, რომელიც დღეს პროკურატურამ გაასაჯაროვა კითხვები გაუჩინა და გიორგი გახარიასთვისაც უმჯობესი იქნებოდა ინსტიტუციური ნდობისთვის ზედამხედველის ფუნქცია პარლამენტმა აიღოს ხელში.

კითხვაზე, შეიძლება თუ არა შეიწიროს ამ წერილმა ხელისუფლება, თუ მისი ავთენტურობა დადასტურდა, ეკა ბესელია პასუხობს: "თუ დადასტურა, რომ ეს სიმართლეა, რას ამბობს ნინო.. ეს უმძიმესი სურათის მატარებელია. საბოლოო შეფასებებს ფრთხილად ვეკიდები, ამიტომ პირველ ეტაპზე რაც მიმაჩნია, რომ იქნებოდა სწორი და მართებული, არის ის, რომ მხარედ არ გამოჩნდე. მე მგონია, რომ პარლამენტმა აუცილებლად უნდა აიღოს თავის თავზე ზედამხედველის, მაკონტროლებლის ფუნქცია და დაიწყოს ამ საკითხის დეტალური შესწავლა და დადოს საზოგადოების წინაშე ღიად".

პროკურატურამ გაასაჯაროვა თიბისი ბანკის დამფუძნებლის, მამუკა ხაზარაძის მიერ მტკიცებულებად წარდგენილი დოკუმენტი, რომელიც ხაზარაძის განცხადებით, ამტკიცებს, რომ შს მინისტრი გიორგი გახარია მას ემუქრებოდა. წერილის მიხედვით, ხაზარაძეს სამ პირობის შესრულებას სთხოვდნენ. პირველი - ტელეკომპანია პირველმა შეიცვალოს სარედაქციო პოლიტიკა და ტელეკომპანია იმედის მსგავსად ჩაერთოს ომში ოპოზიცის წინააღმდეგ. მეორე — ხაზარაძემ გააკეთოს განცხადება, რომ მისთვის მიუღებელია ნაციონალური მოძრაობის რევანში და ბიზნესს კარგად ახსოვს, როგორ ექცეოდნენ წინა ხელისუფლების პირობებში. მესამე — ტელეკომპანია არტარეა, რომელიც ხაზარაძის საკუთრებაა, ჩაერთოს პოლიტიკურ კამპანიაში.