"დღეს არის 8 მარტი, პირველი აპრილი რომ იყოს უფრო გამიადვილდებოდა ამ წერილზე განმარტების გაკეთება", — ასე გამოეხმაურა საქართველოს პრემიერ-მინისტრი მამუკა ბახტაძე თიბისი ბანკის დამფუძნებლის მამუკა ხაზარაძის მიერ პროკურატურაში წარდგენილ წერილს.

პრემიერ-მინისტრის თქმით, დღეს რომ პირველი აპრილი იყოს ისიც შეიძლება ეთქვა, რომ გიორგი გახარიამ მასთან დაადასტურა, რომ ნამდვილად ჩაწერა წერილში მათ შორის ის, რომ არტ არეასთან ერთად სხვა რომელიმე მუსიკალური არხისგან ან რაგბი TV-სგან სარედაქციო პოლიტიკის შეცვლას ითხოვდა.

"მინდა დავადასტურო, რომ ბუნებრივია ნებისმიერი მინისტრი ჩემი კაბინეტიდან მზად არის გასცეს ყველა კითხვას პასუხი, ეს იქნება საქართველოს პარლამენტში თუ საგამოძიებო ორგანოში. რაც შეეხება წერილის შინაარსს, გამიჭირდება ამაზე სერიოზული კომენტარის გაკეთება", — განაცხადა მამუკა ბახტაძემ.

მისი თქმით, ბრალდებები, რომ ხელისუფლება ზეწოლას ახდენს ბიზნესზე, უსაფუძვლოა და ობიექტური კრიტერიუმები არ გააჩნია.

"შეფასებებში ხშირად ვისმენთ პოლიტიკურად მოტივირებულ და დამახინჯებულ ფაქტებს", — განაცხადა მთავრობის ლიდერმა.

ის აცხადებს, რომ ბიზნესის თავისუფლებაზე საერთაშორისო რეიტინგები მეტყველებს, რაც მისთვის საკითხის შეფასებისას ობიექტური კრიტერიუმია.

ბახტაძის თქმით, ქართული ოცნების ყველაზე დიდი მონაპოვარი თავისუფლება და მედიაპლურალიზმია. მან ასევე უპასუხა ბრალდებებს, რომელიც შინაგან საქმეთა მინისტრის, გიორგი გახარიას წინააღმდეგ გავრცელდა.

"ის ჩვენს გუნდში შემოვიდა, როგორც ბიზნესომბუდსმენი და ჩემი თვალით მაქვს ნანახი, როგორ ეხმარებოდა ის მართლა გამწარებულ მეწარმეებს ნაციონალური მოძრაობისგან, რომ მათ თავისი უფლებები აღედგინათ. ეს პირადად ჩემთვის კიდევ უფრო მასტიმულირებელია იმ ფაქტის, ვიფიქრო, რომ ეს არის პოლიტიკურად ორკესტრირებული საქმე", — განაცხადა მამუკა ბახტაძემ.

პროკურატურამ გაასაჯაროვა თიბისი ბანკის დამფუძნებლის, მამუკა ხაზარაძის მიერ მტკიცებულებად წარდგენილი დოკუმენტი, რომელიც ხაზარაძის განცხადებით, ამტკიცებს, რომ შს მინისტრი გიორგი გახარია მას ემუქრებოდა. წერილის მიხედვით, ხაზარაძეს სამ პირობის შესრულებას სთხოვდნენ. პირველი - ტელეკომპანია პირველმა შეიცვალოს სარედაქციო პოლიტიკა და ტელეკომპანია იმედის მსგავსად ჩაერთოს ომში ოპოზიცის წინააღმდეგ. მეორე — ხაზარაძემ გააკეთოს განცხადება, რომ მისთვის მიუღებელია ნაციონალური მოძრაობის რევანში და ბიზნესს კარგად ახსოვს, როგორ ექცეოდნენ წინა ხელისუფლების პირობებში. მესამე — ტელეკომპანია არტარეა, რომელიც ხაზარაძის საკუთრებაა, ჩაერთოს პოლიტიკურ კამპანიაში.