TV პირველმა ოთხი წერილი გაავრცელა, რომელიც მათი მტკიცებით, თიბისი ბანკის დამფუძნებელმა მამუკა ხაზარაძემ კიბერთავდასხმასთან დაკავშირებით შინაგან საქმეთა მინისტრს, გიორგი გახარიას გაუგზავნა. წერილებში აღნიშნულია, რომ კიბერთავდასხმა თბილისიდან, რუსთაველის 12-დან მოხდა.

წერილებში ჯერ ბანკის თანამშრომელი და შემდეგ მამუკა ხაზარაძე შს მინისტრს, გიორგი გახარიას კიბერთავდასხმაზე აწვდიან ინფორმაციას.

"2018 წლის 16 ივლისს სს თიბისი ბანკის თანამშრომლებმა სამსახურებრივ ელ. ფოსტაზე მიიღეს წერილები, რომლებიც შეიცავდა ე.წ. ვირუსს. წერილი გამოგზავნილი იქნა ელ. ფოსტის მისამართიდან davidloriaa@gmail.com. Subject ველში მითითებულია შემდეგი სათაურები: (1) "შემოსავლების სამსახურის შეტყობინება" და (2) "ტენდერი სარემონტო-სარეკონსტრუქციო სამუშაოებზე". გამოგზავნილ მეილებზე მიბმული იყო ფაილები დასახელებით: Rs.ge, doc, CV.doc. ორივე ფაილი შეიცავდა მავნე VB კოდს, რომელიც უკავშირდებოდა დაშორებულ სერვერს, საიდანაც ცდილობს ვირუსი გადმოწერას", — ვკითხულობთ წერილში.

17 ივლისით დათარიღებულ წერილში აღნიშნულია, რომ ვირუსს "დაინფიცირებული" კომპიუტერის მართვა შეუძლია.

წერილში საკონტაქტო პირად მითითებულმა ადამიანმა On.ge-სთან საუბრისას თქვა, რომ ბანკში IT-დეპარტამენტის სპეციალისტია. გამოძიებასთან დაკავშირებულ არც ერთ კითხვას მან არ უპასუხა.

პირველი წერილი შსს-ში თიბისი ბანკის იურიდიული დეპარტამენტის ხელმძღვანელმა, ეკატერინე ეგუტიამ გაგზავნა, ხოლო დანარჩენ სამს მამუკა ხაზარაძე აწერს ხელს.

ფოტო: TV პირველი

წინა წერილის მსგავსად 15 აგვისტოს წერილშიც აღნიშნულია, რომ ე.წ. მავნე სერვერის IP მისამართი სილქნეტთან არის კავშირში. გარდა ამის ნათქვამია, რომ მისამართი ეკუთვნის შპს გრევითის, რომელიც თბილისში, რუსთაველის 12-ში მდებარეობს. დოკუმენტის მიხედვით, გრევითის სოციალურ ქსელში არაერთი ყალბი ანგარიში აქვს.

რუსთაველის 12-ში არსებულ ე.წ. ტროლების ფაბრიკასთან დაკავშირებით რუსთავი 2-მა 9 მარტს ისაუბრა. სიუჟეტის საპასუხო განცხადებაში სილქნეტმა აღნიშნა, რომ შენობაში სილქნეტის აპარატურა განთავსებული არაა.

გამოძიებასთან დაკავშირებული კითხვებისთვის On.ge სილქნეტს დაუკავშირდა და მათ გვითხრეს, რომ ამ ეტაპისთვის ვერაფერს გვეტყოდნენ.

ბოლო წერილებში მამუკა ხაზარაძე სთხოვს შს მინისტრს, გიორგი გახარიას, რომ გამოძიება პირად კონტროლზე აიყვანოს. გარდა ამისა ის აღნიშნავს, რომ გამოძიების დაწყებიდან დიდი დრო გავიდა, თუმცა გამოძიების მსვლელობის შესახებ ბანკისთვის არაფერია ცნობილი.

ფოტო: TV პირველ

მამუკა ხაზარაძემ კიბერთავდასხმასთან დაკავშირებით 4 მარტს პარლამენტში გამოსვლის დროს ისაუბრა. მან მაშინაც განაცხადა, რომ ბანკის თანამშრომლებმა მიაგნეს ზუსტ მისამართსა და ოთახს, საიდანაც ეს შეტევა განხორციელდა. მისივე თქმით, ეს ოფისი თბილისის ცენტრალურ უბანში მდებარეობს და სავარაუდოდ, ის სივრცეა, საიდანაც ბოტები იმართებიან.

სამთავრობო ტროლები ხაზარაძისა და ჯაფარიძის წინააღმდეგ

მას შემდეგ, რაც ცნობილი გახდა, რომ პროკურატურა თიბისი ბანკის წინააღმდეგ საქმეს ფულის გათეთრების მუხლით იძიებდა ფეისბუქზე მამუკა ხაზარაძისა და ბადრი ჯაფარიძის მადესკრიტიდირებელი პოსტები გამოჩნდა. ფეისბუქტროლები სხვადასხვა გვერდზე და ჯგუფებში ერთი და იმავე ფოტოებს პოსტავდნენ.

არასამთავრობო ორგანიზაცია სამართლიანი არჩევნების კვლევის მიხედვით, ეს გვერდები წინასაარჩევნო პერიოდში ნაციონალური მოძრაობისა და გრიგოლ ვაშაძის დისკრედიტაციის მიზნით აქვეყნებდნენ პოსტებს.

ტროლები ხელახლა გააქტიურდნენ, მას შედეგ, რაც ცნობილი გახდა რომ ხაზარაძემ თანამდებობა დატოვა. მედიის განვითარების ფონდმა კვლევა ჩაატარა და დაასკვნა, რომ Facebook-გვერდებს, რომლებიც მამუკა ხაზარაძის დისკრედიტაციას ეწევა, სამთავრობო ტროლი, Avtandil Kereselidze მართავს. კვლევით დადგინდა, რომ აღნიშნული პირი სოციალურ ქსელში სომხეთის მოქალაქის ფოტოებს იყენებდა. ის მართავდა რამდენიმე ფეისბუქგვერდს, რომელიც სამთავრობო მესიჯებს ატარებს და ხაზარაძის გარდა ოპოზიციის დისკრედიტაციასაც ეწევა.