ქართული ოცნებიდან წასულმა დეპუტატებმა ეკა ბესელიამ, გედევან ფოფხაძემ და ზვიად კვაჭანტირაძემ ვენეციის კომისიის დასკვნასთან დაკავშირებით საგანგებო ბრიფინგი გამართეს.

ეკა ბესელიას განცხადებით, ვენეციის კომისიის დასკვნა იმაზე მეტად კრიტიკულია, ვიდრე მოელოდა, რაც ნიშნავს, რომ უმრავლესობის მიერ მომზადებული კანონპროექტი მოსამართლეების არჩევაზე არის ცუდი და უნდა ჩავარდეს.

"ყველა ის ადამიანი, ვინც ამბობს, რომ ეს დასკვნა არის დადებითი, ან ცრუობს ან საკუთარ თავს იტყუებს. ეს არის უმძიმესი, უმკაცრესი, ძალიან კრიტიკული შეფასებები. ის, რაც არ არის გაკრიტიკებული, არის მხოლოდ კანონპროექტის სათაური, ყველაფერი დანარჩენი არის კრიტიკის ქარცეცხლში გატარებული და დარჩენილია მარტო კანონპროექტის ყდა", — განაცხადა ბესელიამ.

მან მიმოიხილა ყველა ის მიმართულება, რომელიც ვენეციის კომისიას დასკვნაში გააკრიტიკა და ქართული ოცნება ნაციონალურ მოძრაობას შეადარა.

"ვფიქრობდი, რომ იქნებოდა კრიტიკა, მაგრამ ასე შორს თუ წავიდოდა ეს კრიტიკა არ ველოდი. ყალბი გულდამშვიდება მმართველი პარტიის მხრიდან ჰგავს ნაციონალური მოძრაობის ხელწერას. მე მინდა მივმართო მმართველ პარტიას, ნუ ემსგავსებით ნაციონალურ მოძრაობას. ასეთი პოზით, ასეთი როლით და განცხადებებით მე მაგონებთ იმ პოლიტიკურ ძალას, რომელსაც ყველამ უარი ვუთხარით, რომლებიც ატყუებდნენ თავს, საზოგადოებას, არ უჯერებდნენ არავის, არც შიგნით არც გარეთ, არ უსმენდნენ არავის და თეთრზე ამბობდნენ შავს და პირიქით",— განაცხადა ბესელიამ.

მან უმრავლესობას შესთავაზა მის მიერ მომზადებული კანონპროექტი მიიღონ, რომელიც ბესელიას თქმით, ვენეციის კომისიის ყველა რეკომენდაციას ითვალისწინებს.

"მე მიმაჩნია, რომ ეს კანონპროექტი არ ვარგა, ეს კანონპროექტი პრინციპების დონეზე შესაცვლელია. ეს ვერ მოხდება მეორე მოსმენის დროს. ამ კანონპროექტის მიღება იქნება წასვლა ყველას წინააღმდეგ. ეს კანონპროექტი უნდა ჩავარდეს და ჩვენი კანონპროექტი, რომელიც მზად ვართ წარვადგინოთ ამ სესიაზე, ითვალისწინებს ყველა იმ რეკომენდაციას, რასაც ვენეციის კომისია გვთავაზობს. კობახიძის კანონპროექტი უნდა ჩავარდეს და ჩვენი კანონპროექტი უნდა მიიღოთ", — თქვა დეპუტატმა.

ვენეციის კომისიის რეკომენდაციები უზენაესის მოსამართლეთა დანიშვნის წესებთან დაკავშირებით უკვე ცნობილია. დოკუმენტი 14-გვერდიანია და 68 პუნქტს მოიცავს. საპარლამენტო უმრავლესობა ირწმუნება, რომ დასკვნა პოზიტიურია, არასამთავრობო სექტორი და ოპოზიცია კი მიიჩნევს, რომ ვენეციის კომისია მოსალოდნელზე მეტად კრიტიკული იყო. საქართველოს პარლამენტის თავმჯდომარე კომისიის დასკვნებთან დაკავშირებით უკვე შეხვდა არასამთავრობო სექტორს, დიპლომატიურ კორპუსს და დეპუტატებს. რეკომენდაციები პარლამენტის პლენარულ სხდომაზე უნდა განიხილონ.

გაიგე მეტი:

• არაკომფორტული დოკუმენტი — არასამთავრობოებისა და ვენეციის კომისიის შენიშვნები ერთმანეთს დაემთხვა
• რა წერია ვენეციის კომისიის დასკვნაში უზენაესის მოსამართლეების დანიშვნაზე — რეკომენდაციები
• ქართული ოცნება VS ვენეციის კომისია — კრიტიკული რეკომენდაციები