სამართლიანი არჩევნების მოთხოვნით გამართულ აქციაზე, რომელიც სახაროვის მოედანზე მიმდინარეობს, 40 000-ზე მეტი ადამიანი მივიდა. ამ ინფორაცია TVrain.ru "თეთრ მრიცხველზე" დაყრდნობით ავრცელებს.

აქცია, რომელიც მოსკოვში იმართება, ამჯერად, ხელისუფლებასთან შეთანხმებულია. აქტივისტებისთვის სპეციალური ტერიტორიაა გამოყოფილი, რომელსაც სპეციალური დანიშნულების რაზმი იცავს. აქციაზე მისულებს სიტყვით ოპოზიციონერი ლიდერები მიმართავენ. ასევე სრულდება საპროტესტო სიმღერებიც.

წინა ორი აქცია ხელისუფლებასთან შეთანხმებული არ იყო და მასობრივი დაკავებებით დასრულდა. ჯამში ორივე აქციაზე 3 000-მდე დემონსტრანტი დააკავეს, მათ შორის ჟურნალისტები და ოპოზიციონერი ლიდერები.

რა ხდება მოსკოვში

მოსკოვში 8 სექტემბერს დუმის არჩევნები გაიმართება. არასაპარლამენტო პარტიებიდან კანდიდატების კენჭისყრაში მონაწილეობისთვის საჭირო იყო რამდენიმე ათასი ისეთი ამომრჩევლის ხელმოწერა, რომლებიც შესაბამის ოლქში არიან რეგისტრირებული. არჩევნებისთვის რეგისტრაციაზე უარი უთხრეს რამდენიმე ოპოზიციონერ კანდიდატს. მათ შორის, არიან მოსკოველი დეპუტატები, ილია იაშინი და იულოია გალიამინა, ასევე კორუფციასთან ბრძოლის ფონდის თანამშრომლები ლიუბოვ სობოლი და ივან ჟდანოვი, პოლიტიკოსები დმიტრი გუდკოვი და სერგეი მიტროხინი.

სწორედ ამას მოყვა მასშტაბური პროტესტი მოსკოვში. ოპოზიციის მხარდამჭერები კორუფციის წინააღმდეგ და სამართლიანი არჩევნების მოთხოვნით გამოვიდნენ აქციაზე.

"ჩვენ გვაქვს უფლება გვყავდეს საკუთარი კანდიდატი", "სირცხვილია" — ამ და სხვა სლოგანებით მათ გუშინ, 27 ივლისს არაერთ ლოკაციაზე გამართეს აქცია. პოლიცია და სპეცრაზმი მათ სცემდა, აკავებდა, ალყაში აქცევდა და დევნიდა, თუმცა აქცია გრძელდებოდა.

პროტესტის პარალელურად სპეცრაზმი შეიჭრა ოპოზიციური მედიის ნავალნი ლაივის სტუდიაში, რომელიც აქციას პირდაპირ ეთერში აშუქებდა. პოლიცია შევიდა დამოუკიდებელი მედიის დოჟდის შენობაშიც, რომელიც, ასევე, პირდაპირ ეთერში აშუქებდა პროტესტს და მთავარ რედაქტორს დაკითხვის ოქმი ჩააბარა. ის აქციების შესახებ დაკითხეს.

პოლიცია დაკავების მიზეზად აქციის არასანქცირებულობას და დემონსტრანტების აგრესიას ასახელებდა. თუმცა, ისინი აკავებდნენ ყველას. მათ შორის, აქტივისტებს, რომლებიც ჰიმნს მღეროდნენ და ოპოზიციონერ პოლიტიკოსებს, რომლებიც კონსტიტუციურ უფლებებზე საუბრობდნენ.

რუსეთში, ოპოზიციურ აქციებზე, სადაც სამართლიან არჩევნებს ითხოვდნენ გასულ კვირას 1 373 ადამიანი დააკავეს. ინფორმაციას ამის შესახებ გამოცემა ოვდ ინფო ავრცელებს, რომელიც დამოუკიდებელი მედია პროექტია და რუსეთში პოლიტიკურ დევნას შეისწავლის. რაც შეეხება რუსეთის შინაგან საქმეთა სამინისტროს, ისინი მხოლოდ 1 074 ადამიანის დაკავებას ადასტურებენ.