უკანასკნელ წუთებში ცესკოდან მიღებული განახლებული მონაცემებით, პარტია პატრიოტთა ალიანსი 5 პროცენტს იმ შემთხვევაში აგროვებს, თუ ხმების პროცენტულ მაჩვენებელს მეასედებამდე დავამრგვალებთ.

ბოლო განახლებამდე პატრიოტთა ალიანსს ჰქონდა 88 032 ხმა (4,993%), ახლა კი აქვს 88 132. ეს არის დამუშავებული ხმების 4,998%. ცესკოს საიტზე კი ორივე მონაცემის შემთხვევაში, განახლებამდეც და განახლების შემდეგაც, პატრიოტთა ალიანსს ეწერა 5%. მნიშვნელოვანია ისიც, რომ მონაცემთა ბოლო განახლების დროს არ შეცვლილა დათვლილი უბნების რაოდენობა და ის კვლავ 99,92%-ია.

ცესკოს მონაცემებით, სხვა პარტიებსაც გაეზარდათ ხმების რაოდენობა:

• ნაციონალური მოძრაობა - 106 ხმა;
• თავისუფალი დემოკრატები - 95 ხმა;
• ზვიადის გზას - 8 ხმა;
• ქართულ ოცნებას - 536 ხმა.

ამავდროულად, 30 ნომერს, ჩვენ საქართველოს მოაკლდა 611 ხმა.

On.ge-ს საიტზეც სწორედ მეასედებამდე დამრგვალებული პროცენტია ასახული. თუმცა, სისტემა ბარიერის გადალახვას დაუმრგვალებელი პროცენტის მიხედვით აფასებს, რაც ჯერ კიდევ არ უდრის 5 პროცენტს. ჩვენი სისტემა საქართველოს საარჩევნო კოდექსის ზედმიწევნით დაცვის შედეგად არის შემუშავებული, სადაც ბარიერის გადალახვისას, დამრგვალების გათვალისწინება განსაზღვრული არ არის.

ჩვენ მივმართეთ ცესკოს შეკითხვით, თუ როგორ უნდა მოვიქცეთ ასეთ შემთხვევაში - თვლის თუ არა საარჩევნო ადმინისტრაცია ამ შედეგს, როგორც ბარიერის გადალახვას. On.ge-ს შეკითხვას, ამ დროის მონაცემებით, შევიდა თუ არა პატრიოტთა ალიანსი პარლამენტში და ამრგვალებს თუ არა ზემოაღნიშნულ მონაცემებს ცესკო, უწყების პრესსპიკერმა, ანა მიქელაძემ ვერ უპასუხა და განაცხადა, რომ ცესკო მონაცემებს ახლაც ამუშავებს:

"ყოველ წუთს ახლდება მონაცემები. დამრგვალება არ ხდება და დეტალებს შეგატყობინებთ".

ჩვენ ასევე ვუთხარით მიქელაძეს, რომ ცესკოს საიტზე იმ საარჩევნო უბნების რაოდენობა საიდანაც ცესკოს მონაცემები აქვს, არ შეცვლილა, თუმცა ზოგიერთი პარტიისთვის მიცემულ ხმათა რაოდენობა გაიზრდა, ზოგიერთის კი შემცირდა და ვთხოვეთ ამ ფაქტის ახსნა, რაზეც მან გვიპასუხა:

"მონაცემები ხომ მოწმდება, მონაცემი შედის ბაზაში. ზოგიერთ ოქმს თავისი შემოწმების ოქმი აქვს და იმას ამოწმებენ ოპერატორები".

ჩვენ ვთხოვეთ მიქელაძეს დაეზუსტებინა მისი პასუხი, თუმცა გვითხრა, რომ სხვას ვერაფერს გვეტყოდა და დამატებით ინფორმაციას ნახევარ საათში მოგვაწვდიდა.

განახლება: სტატიის თავდაპირველ სათაურში ეწერა, რომ ცესკომ პატრიოტთა ალიანსს ხმები 100 ერთეული გაუზარდა. უფრო მეტი სიზუსტისთვის შეიცვალა სათაური, რადგან ხმების რაოდენობა გაეზარდა სხვა რამდენიმე პარტიასაც.