ქართული ოცნების დეპუტატი რატი იონათამიშვილი, თანაპარტიელების მსგავსად, Facebook-ის განცხადების შეფასებისას ნაციონალურ მოძრაობაზე საუბრობს. ის აცხადებს, რომ ყალბი ამბების და დეზინფორმაციის გავრცელება ოპოზიციური პარტიის მოქმედების სტილია.

"იმდენად დიდი კრახი განიცადა ქვეყნის შიგნით ნაციონალურმა მოძრაობამ, რომ ახლა ძირითადად ორ რამეზე არიან გადასული:

  1. თუ სადმე კონტაქტი შერჩათ საერთაშორისო ასპარეზზე, ცდილობენ, რომ ნეგატიური მესიჯები მოიპოვონ მათგან. ერთი-ორ შემთხვევაში ეს გამოუვიდათ, მაგრამ უნდა აღვნიშნოთ, რომ აქაც უფრო მეტად ებრძვიან საქართველოს, ვიდრე ქართულ ოცნებას.
  2. ის, რაც ჩვეული არის, რომ ვირტუალური ცხოვრებით ცხოვრობენ და ცალკეული გვერდების, მათ შორის არ გამოვრიცხავ თვითონ მათ მიერ შექმნილი გვერდების, დარეპორტებით, ცდილობენ ფონს გასვლას", — აცხადებს იონათამიშვილი.

ამ საკითხზე მსგავსი პოზიციები ჰქონდათ მმართველი გუნდის სხვა წევრებს, მამუკა მდინარაძეს, ირაკლი დაჩი ბერაიას, ცოტნე ზურაბიანს, დავით ზალკალიანს და სხვებს.

20 დეკემბერს ფეისბუქმა ასეულობით გვერდი და ანგარიში დაბლოკა, რომელიც მათი განცხადებით, მმართველ გუნდთან იყვნენ კავშირში და დეზინფორმაციას ავრცელებდნენ. მათი თქმით, ამ გვერდებისა და ანგარიშების რეკლამირებაში თითქმის $316 ათასი დაიხარჯა.

ფეისბუქის განცხადებაში ნათქვამია, რომ ამჟამად უკვე წაშლილი გვერდები მმართველ ძალასთან, ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.

"მიუხედავად იმისა, რომ ანგარიშების უკან მდგომი ადამიანები ცდილობდნენ, შეენიღბათ კოორდინირებული მუშაობა, კვალს სარეკლამო კომპანია პანდასთან და ქართული ოცნების ხელისუფლებასთან მივყავართ", — ნათქვამია განცხადებაში.

როგორც ატლანტიკური საბჭოს ციფრული გამოძიების კვლევის ლაბორატორია აცხადებს, გვერდები უმეტესად ქართულ აუდიტორიაზე მუშაობდნენ და ავრცელებდნენ ისეთ სოციო-პოლიტიკურ კონტენტს, რომელიც საზოგადოების პოლარიზაციას უწყობდა ხელს, თავს ესხმოდა ოპოზიციურ პარტიებსა და სამოქალაქო საზოგადოებას და საქართველოს დასავლელი პარტნიორების, კონკრეტულად კი ამერიკის შეერთებული შტატების დისკრედიტაციას ეწეოდა.