დღეს, 22 დეკემბერს პოლიტიკური გაერთიანება ლელო საქართველოსთვის დაფუძნდა. ყრილობა თბილისში, საგამოფენო ცენტრ ექსპო-ჯორჯიაში გაიმართა. პარტიის პირველი შეკრება გახსნა ერთ-ერთმა დამფუძნებელმა ბადრი ჯაფარიძემ. მისი თქმით, ყრილობას ესწრება 1520 დელეგატი.

პარტიის თავმჯდომარედ დაამტკიცეს მამუკა ხაზარაძე. მისი წარდგენით, პოლიტიკური პარტიის თავმჯდომარე იქნება დავით უსუფაშვილი, პარტიის გენერალური მდივანი კი ბადრი ჯაფარიძე. გაერთიანებაში შევიდნენ პარტია შენების მოძრაობა და ახალი მემარჯვენეები. პოლიტიკური საბჭოს შემადგენლობაში იქნებიან:

1. ლაშა ბაქრაძე — ლიტერატურის მუზეუმის დირექტორი, ილიას უნივერსიტეტის პროფესორი;
2. საბა ბუაძე — იურისტი;
3. დეა მეტრეველი — ფილოლოგიის დოქტორი, ხელმძღვანელობდა ქართული წიგნის ეროვნულ ცენტრს და 2018 წლის ფრანკფურთის წიგნის ბაზრობაზე საქართველოს საპატიო სტუმრის პროექტს;
4. გრიგოლ გეგელია — პოლიტიკური თეორიის დოქტორი;
5. თამაზ დათუნაშვილი — სოციალური ადმინისტრირების მაგისტრი, პარლამენტის მე-8 მოწვევის მაჟორიტარი დეპუტატი გორიდან;
6. სოსო ვახტანგაშვილი — ისტორიის მეცნიერებათა დოქტორი;
7. ანა ნაცვლიშვილი — იურისტი, უფლებადამცველი, საიას ყოფილი თავმჯდომარე, ყოფილი პრეზიდენტის, გიორგი მარგველაშვილის საპარლამენტო მდივანი;
8. ირაკლი კუპრაძე — საჯარო სამართლის იურისტი, სამოქალაქო აქტივისტი;
9. მამუკა კაციტაძე — ახალი მემარჯვენეების წევრი, ყოფილი დეპუტატი;
10. კახა კოჟორიძე — საიას ყოფილი თავმჯდომარე, ყოფილი პრეზიდენტის, გიორგი მარგველაშვილის პოლიტიკური მრჩეველი;
11. გია მორდეხაშვილი — ბიზნესმენი;
12. თამარ შავგულიძე — ხელოვნებათმცოდნე;
13. დავით უსუფაშვილი — პარლამენტის ყოფილი თავმჯდომარე, პარტია შენების მოძრაობის ლიდერი;
14. ფიქრია ჩიხრაძე — ყოფილი პარლამენტარი, ყოფილი პრეზიდენტის, გიორგი მარგველაშვილის მრჩეველი;
15. გიორგი კანაშვილი — კავკასიის სახლის ყოფილი დირექტორი;
16. კახა ხაზარაძე — ბიზნესმენი;
17. ბადრი ჯაფარიძე — თიბისის დამფუძნებელი.

"ლელო ღია იქნება საქართველოს ყველა მოქალაქისათვის, ყველასათვის, ვინც იზიარებს იმ ძირითად ღირებულებებსა და ფასეულობებს, რამაც ჩვენ ამ დარბაზში მყოფნი გაგვაერთიანა. ამ ღირებულებებზე დაფუძნებული ერთობა კი გაუძლებს ყველა გამოწვევას და ჩვენ აუცილებლად გავიტანთ ლელოს საქართველოსთვის", — თქვა ბადრი ჯაფარიძემ ყრილობაზე სიტყვით გამოსვლისას.

ყრილობაზე დაამტკიცეს პარტიის წესდება, ასევე, წარმოადგინეს პარტიის ლოგო. პარტიის წარმომადგენლის თქმით, ესკიზი არის ქართული ასო "ლასი-ს" ილუსტრაცია და განასახიერებს შეკრულს მუშტს.