ამერიკის მთავრობის დაფინანსებით შიდა ქართლში, ადმინისტრაციული გამყოფი ზოლის მახლობლად საჯარო სკოლა გარემონტდა. პროექტის ღირებულება 2,5 მილიონი ლარია და ის 200 მოსწავლეზეა გათვლილი. ელჩის მოადგილე ელიზაბედ რუდმა დღეს, 15 იანვარს სკოლა ოფიციალურად გახსნა.

სოფელი ქვეშის სკოლას აქვს სამსართულიანი შენობა, სადაც ორასი მოსწავლე სწავლობს დაახლოებით 800 ოჯახით დასახლებული ორი მეზობელი სოფლიდან. აშშ-ს საელჩოს განცხადებით, პროექტის ფარგლებში სრულად გარემონტდა სამსართულიანი შენობა განახლდა ინტერიერი (კედლები, ფანჯრები, კარები და იატაკი).

ქვეშის საჯარო სკოლის სრულად გასარემონტებლად ფინანსური დახმარება გამოიყო აშშ-ის თავდაცვის დეპარტამენტის ჰუმანიტარული, კატასტროფისა და სამოქალაქო დახმარების (OHDACA) ფონდიდან. პროექტის მიზანია როგორც სასწავლო, ისე სანიტარული/ჰიგიენური პირობების გაუმჯობესება. სარემონტო სამუშაოები განახორციელა აშშ-ის არმიის ინჟინერთა კორპუსმა.