საპარლამენტო უმრავლესობის ლიდერი, მამუკა მდინარაძე ამბობს, რომ პარლამენტში კრიტიკული აზრის გამოთქმა მნიშვნელოვანია, თუმცა ოპოზიციას არ უნდა, რომ ქვეყანაში საპარლამენტო დემოკრატია შედგეს. მისი თქმით, საპარლამენტო ოპოზიციის წევრებს ყოველთვის აქვთ ბოიკოტის საბაბი და ხელფასს ბოიკოტის რეჟიმში იღებენ.

"ოპოზიციას აქვს თავისი პასუხისმგებლობა. სხვათა შორის, საკანონმდებლო ორგანოში ისინი წარმოადგენენ ასევე ხელისუფლებას. ხელისუფლების განაწილების პრინციპში მათი როლიც არის შესაბამისი. მათ უნდა გააკეთონ თავისი საქმე. ისინი ჩვენთან ერთად წარმოადგენენ საკანონმდებლო ორგანოს. ხელფასს იმაში იღებენ, რომ ბოიკოტს აცხადებენ და ნიღბებით დარბიან პარლამენტში და უხერხულ სიტუაციას ქმნიან, ეს მათი არჩევანია", — განაცხადა მდინარაძემ.

პროპორციულის ჩავარდნა, პროტესტი და პოლიტიკური დაპირისპირება — მოკლედ

მას შემდეგ, რაც ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიადნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება. ამ მოთხოვნით მათ ბოიკოტი გამოაცხადეს.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციებმა მაჟორიტარი დეპუტატებისა და ოცნების ოფისთან გადაინაცვლა, სადაც აქტივისტებს მმართველი გუნდის მხარდამჭერები ხვდებოდნენ და ფიზიკურად უსწორდებოდნენ. გარდა ამისა, განახლდა საპროტესტო მოძრაობა "არა ნაცებს" და გაიმართა აქციები სახელად "დემიშიზაცია", რომელთა წევრები ნაციონალური მოძრაობის ოფისებს კვერცხებს და ცოცხებს ესროდნენ, მხარდამჭერებსა და აქტივისტებს კი ფიზიკურად უსწორდებოდნენ.