რუსთავი 2-ის გენერალური დირექტორი, ნიკა გვარამია, შსს-ს ცენტრალური კრიმინალური პოლიციის დეპარტამენტში დაკითხვაზეა დაბარებული. ამის შესახებ ინფორმაციას რუსთავი 2 ავრცელებს.

ტელეკომპანიის ცნობით, გვარამია მოწმის სახით შს სამინისტროში 3 ნოემბერს უნდა გამოცხადდეს და დაიკითხოს.

"უწყებაში, რომელიც გვარამიას დღეს, 1 ნოემბერს გაუგზავნეს, ნათვამია, რომ გვარამია დაიკითხება კომპიუტერულ სისტემაში უნებართვოდ შეღწევის, პირადი საუბრების უკანონოდ მოპოვებისა და გავრცელების საქმეზე",- წერს რუსთავი 2.

შსს-მ ნიკა გვარამიას საჯარო განცხადების საფუძველზე, გამოძიება 2016 წლის 3 ოქტომბერს დაიწყო. საქმე ეხება ინტერნეტში ნიკა გვარამიასა და მამუკა ახვლედიანის საუბრის ჩანაწერის გავრცელებას.

ნიკა გვარამიას განცხადებით, ფარული ჩანაწერი, რომელშიც ის საქალაქო სასამართლოს ყოფილ თავმჯდომარეს, მამუკა ახვლედიანს ესაუბრება, თავად მისი გაკეთებულია, თუმცა მისივე თქმით, ქსელში ვიღაც სხვამ გაავრცელა.