საქართველოს პრეზიდენტი სალომე ზურაბიშვილი ფიქრობს, რომ ქვეყანაში ქალთა მიმართ ძალადობას "გასაქანი მისცა" კულტურასთან ერთგვარმა გაუცხოებამ. მისი აზრით, ეს ჩვენი კულტურისთვის "სრულიად უჩვეულო მოვლენაა". ამის შესახებ პრეზიდენტმა პარლამენტში ყოველწლიური ანგარიშის წარდგენისას ისაუბრა.

"ჩვენს კულტურასთან ერთგვარმა გაუცხოებამ მისცა გასაქანი საზოგადოებაში შიშსა და უნდობლობას, შეთქმულების თეორიებს თუ სიძულვილის ენას, ჩვენი კულტურისთვის სრულიად უჩვეულო მოვლენას, როგორიც არის ძალადობა ქალთა მიმართ. გაუცხოების შედეგია რწმენისა და ეკლესიის შელახვის მცდელობები", — განაცხადა მან.

13 თებერვალს შინაგან საქმეთა სამინისტრომ ოჯახური დანაშაულის სტატისტიკა წარადგინა. უწყების თქმით, 2019 წელს ოჯახურ დანაშაულს 7 ქალი ემსხვერპლა, რაც 2018 წლის მაჩვენებელს უდრის, თუმცა წინა წლებზე თითქმის ორჯერ ნაკლებია. შსს-ში ამბობდნენ, რომ ამ დანაშაულზე მიმართვიანობა გაიზარდა და 6 000-ზე მეტ ფაქტზე დაიწყეს გამოძიება, ბრალი წარუდგინეს 4 564 მოძალადეს და 10 266 შემაკავებელი ორდერიც გამოწერეს.

ამ პრესკონფერენციის მეორე დღეს დმანისში ქალი მოკლეს, 3 დღეში ყარაჯალაში ყოფილმა ქმარმა ცოლი არასრულწლოვანი შვილების თანდასწრებით მოკლა, მომდევნო ორ დღეში კი სამტრედიაში კაცმა განქორწინების გასაფორმებლად მისული ცოლი რეესტრში მოკლა.

საქართველოს პრეზიდენტი სალომე ზურაბიშვილი დღეს, 4 მარტს პარლამენტის წინაშე ყოველწლიური მოხსენებით წარსდგა. ოპოზიცია, რომელიც ბოიკოტის რეჟიმშია პრეზიდენტის გამოსვლას არ ესწრებოდა. ზურაბიშვილს ბოიკოტი გამოუცხადა ფრაქცია დამოუკიდებელმა დეპუტატებმაც.

გაიგეთ მეტი პრეზიდენტის პარლამენტში გამოსვლაზე: