აჭარის მაუწყებლის წამყვანს, თეონა თურმანიძეს საინფორმაციო სამსახურის უფროსის მოვალეობის შემსრულებელმა, გიორგი აბაზაძემ ჯერ შესთავაზა მთავარი საინფორმაციო გამოშვების წაყვანა, შემდეგ კი უარი უთხრა.

შეთავაზების მიღების შესახებ წამყვანმა სამსაათიან გამოშვებაში ისაუბრა და განმარტა, რომ მაუწყებელში არსებული კრიზისის გამო თანახმა იყო მთავარი საინფორმაციოს წამყვანი, თეონა ბაკურიძე დროებით შეეცვალა. მოგვიანებით, აჭარის მაუწყებელმა გაავრცელა ინფორმაცია, რომ ეს შეთავაზება აბაზაძემ უკან წაიღო, რის მიზეზადაც ის დაასახელა, რომ თურმანიძის თანხმობა შეთავაზებაზე ეთერიდან არ უნდა გაეგო. მისი თქმით, უკვე მუშაობდა იმაზე, რომ გადაცემა თავად წაეყვანა.

"ეთერში სათქმელი არ იყო, რად უნდოდა ეთერში გამოცხადება, მანამდე ეთქვა", — განაცხადა აბაზაძემ.

აჭარის მაუწყებლის ჟურნალისტის კითხვაზე, დაარღვია თუ არა წამყვანმა რაიმე ეთერში გამოცხადებით, აბაზაძე პასუხობს, რომ არა და თურმანიძე ეთერიდან დარღვევის გამო არ მოუხსნია.

მისივე თქმით, მიუხედავად იმისა, რომ დღეს მაუწყებლის დირექტორს შეხვდა, ამ თემაზე არ უსაუბრია და საინფორმაციოს წაყვანა მისთვის არავის შეუთავაზებია, რადგან ეს ხელშეკრულებაში აქვს გაწერილი.

"როცა ხელშეკრულებას ხელი მოვაწერე იქ მეწერა, რომ ვარ ახალი ამბების წამყვანიც. ეს პუნქტი ამოღებული არ არის და საჭიროების შემთხვევაში დავჯდები ეთერში", — განაცხადა მან.

მთავარი საინფორმაციოს წამყვანს, თეონა ბაკურიძეს უფლებამოსილება 6 მარტს შეუჩერეს. მიზეზად კი ის დაასახელეს, რომ გიორგი აბაზაძეზე ფსიქოლოგიურ ზეწოლას ცდილობდა. აღნიშნულთან დაკავშირებით დაწყებულია მოკვლევა.

აჭარის მაუწყებელში მიმდინარე მოვლენები

ბოლო რამდენიმე თვეა, მას შემდეგ, რაც ტელევიზიის დირექტორი ქართული ოცნების მიერ დაკომპლექტებული ბორდის შერჩეული გიორგი კოხრეიძე გახდა, აჭარის ტელევიზიაში სიტუაცია იძაბება. თანამშრომლები დირექტორის გადაწყვეტილებებს აპროტესტებდნენ, რომლებიც სარედაქციო დამოუკიდებლობის შესუსტების მცდელობად მიაჩნიათ.

კერძოდ, კოხრეიძემ უფლებამოსილება შეუმცირა თავის მოადგილეს, ნათია ზოიძეს, რომელსაც ამ მიზეზით არხიდან წასვლა მოუწია. 19 თებერვალს კი გაუუქმა თანამდებობა საინფორმაციო სამსახურის უფროსის მოადგილეს, მაია მერკვილაძეს. 28 თებერვალს მან სამსახურიდან გაათავისუფლა საზოგადოებრივი მაუწყებლის აჭარის ტელევიზიისა და რადიოს საინფორმაციო სამსახურის უფროსი, შორენა ღლონტი.

4 მარტს აჭარის მაუწყებლის საინფორმაციო სამსახურის უფროსის მოვალეობის შემსრულებლად დაინიშნა გიორგი აბაზაძე, რომელიც სოციალურ ქსელებში ჰომოფობიური და სექსისტური შინაარსის გზავნილებით გამოირჩეოდა. ჟურნალისტების განცხადებით, მისი შერჩევის პროცესი გაუმჭვირვალე იყო. მათი თქმით, დირექტორს, აღნიშნულ თანამდებობაზე, ლაშა ზარგინავას ან ირინა ყურუას კანდიდატურას სთავაზობდნენ, თუმცა ეს არ გაითვალისწინეს.

6 მარტს, კი თეონა ბაკურიძეს დროებით უფლებამოსილება შეუჩერეს. დირექტორის შესაბამის ბრძანებაში აღნიშნულია, რომ ტელეწამყვანი საინფორმაციო სამსახურის ახალ უფროსზე "ახდენდა ფსიქოლოგიურ ზეწოლას და აიძულებდა აბაზაძეს განცხადების საფუძველზე დაეტოვებინა მისი პოზიცია". აღნიშნულთან დაკავშირებით დაწყებულია მოკვლევა.

ამავე თემაზე: