დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

დაავადებათა კონტროლის ცენტრის დირექტორის მოადგილე, პაატა იმნაძე კიდევ ერთხელ განმარტავს, რომ სიმპტომების არარსებობისას კორონავირუსით ინფიცირებული ადამიანი გადამდები არ არის და ეს მხოლოდ "გამონაკლის შემთხვევებში" ხდება, რაც 100 000-ში სულ რამდენიმეა. თუმცა მისივე განმარტებით, მოქალაქეებმა არ უნდა იფიქრონ, რომ ამის გამო თვითიზოლაციაში ან კარანტინში ყოფნა საჭირო არ არის.

იმნაძე განმარტავს, რომ "მედიცინაში 100%-იანი არაფერი არ არსებობს, გამონაკლისები ყოველთვის არის" და თვითიზოლაციია აუცილებელია, რადგან არ იციან როდის შეიძლება დაეწყოს პირს სიმპტომები და ამ დროს რთული იქნება მისი კონტაქტების დადგენა. შესაბამსიად, ვერ მოხდება ვირუსის გავრცელების პრევენცია.

"უსიმპტომოდ არ გადაედება, მაგრამ ხომ არ ვიცით როდის დაეწყება სიმპტომი. როგორ შეიძლება ეს გაიგონ ისე, რომ რადგან უსიმპტომოდ არ გადაედო თვითიზოლაცია საჭირო არ არის", — განაცხადა მან On.ge-სთან საუბრისას.

მისივე თქმით, საქართველოში დაფიქსირებული 23 შემთხვევა სტატისტიკის საშუალებას არ იძლევა, მაგრამ აქაც ასე მოხდა:

"სიმპტომების გამოვლენამდე არ გადადებია სხვას და სიმპტომები, როცა გამოუჩნდა ერთ-ერთ პაციენტს, მაშინ გადაედო. მაგრამ გვქონდა შემთხვევა, როცა ერთ-ერთ პირს სიმპტომები მე-13 დღეს გაუჩნდა, თვითიზოლაციის პერიოდის მიწურულს".

ჯანდაცვის მსოფლიო ორგანიზაციისა და დაავადებათა კონტროლის მსოფლიო ორგანიზაციის ინფორმაციის მიხედვით, როგორც ცნობილია, ვირუსი ყველაზე გადამდები მაშინაა, როდესაც სიმპტომები ყველაზე მეტადაა გამოხატული. ვირუსის გადადება, შესაძლოა, სიმპტომების გამოჩენამდეც მოხდეს — ახალი კორონავირუსის მსგავსი გადაცემის შემთხვევები დაფიქსირებულა, თუმცა ამჟამინდელი ცნობებით, ეს ახალი კორონავირუსის გავრცელების მთავარი მექანიზმი არ არის.

ამ ეტაპზე საქართველოში კორონავირუსით ინფიცირების 23 შემთხვევაა დადასტურებული. პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს, 7 მარტს კორონავირუსით ინფიცირების კიდევ 4 შემთხვევა დადასტურდა, 9 მარტს კორონავირუსი 2 პაციენტს დაუდასტურდა, 10 მარტს კი კორონავირუსის კიდევ 8 შემთხვევა დადასტურდა.

ასევე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

• ჯანდაცვის მსოფლიო ორგანიზაციის აუცილებელი რეკომენდაციები კორონავირუსისგან დასაცავად
• კორონავირუსის პრევენციისთვის საჭირო რჩევები მოგზაურებისთვის
• ჯანდაცვის სამინისტროს რეკომენდაციები ჟურნალისტებისთვის
• რეკომენდაციები თვითიზოლაციაში მყოფები პირებისთვის
• რეკომენდაციები და დამატებითი ინფორმაცია კარანტინში მყოფებისთვის
• გაეცანით ჯანდაცვის სამინისტროს რეკომენდაციებსა და პროტოკოლს თვითიზოლაციისთვის

ამავე თემაზე:

• როგორ უნდა გაიკეთოთ, გამოიყენოთ და გადააგდოთ ნიღაბი
• როგორ დავიბანოთ ხელები სწორად კორონავირუსისგან დასაცავად